2017-2018 jyldar arasynda 25-ten 58 jasqa deıingi eki myń jumyssyz azamattar arasynda júrgizilgen tájirıbege 2000 adam qatysqan. Olarǵa aı saıyn 560 eýro mólsherinde aı saıynǵy kepildi járdemaqy berilip, muny bazalyq tabys retinde qarastyrǵan.
Jobanyń avtorlary adamdar ýaqyt óte kele bazalyq tabyspen shektelmeı, jumys isteýge umtylady dep dámelengen bolatyn. Biraq tegin aqsha, kerisinshe jumyssyzdyq deńgeıine keri áser etetinin kórsetken. Aılyq tabysy 560 eýrodan tómen azamattar tez arada jumystarynan shyǵyp, jumyssyzdardyń qataryn tolyqtyrýǵa asyǵypty. Jobanyń alǵa júrip ketpeýine osy faktorlar sebep bolypty.
Osy tájirıbeniń avtorlarynyń biri Ollı Kangas jobaǵa qatysqandar ózin ózgelermen salystyrǵanda barlyq ólshem boıynsha baqytty ekenin, kóńiliniń toq ekenin aıtqan. Barǵa toqmeıilsý ózin-ózi jetildirýge aparatyn jolyn kesip tastaıtynyn joba avtorlary esten shyǵaryp alǵanǵa uqsaıdy.
Al 2018 jyldary sol elde jumyssyzdar qatary 27 paıyzǵa deıin ósti. Qazir Fınlıandııa úkimeti tıimsiz bolǵandyqtan halyqty qoldaý sharasy retinde shartsyz bazalyq tabys ıdeıasynan bas tartyp, tabys salyǵyn engizý múmkindigin qarastyrýda.
Sarapshylar bul ıdeıa jańalyq emes ekenin aıtady. Bul ıdeıa 503 jyl buryn jaryq kórgen Tomas Mordyń «Ýtopııasynda» aıtylypty. Tomas Mor «árbir jumys istep júrgen azamatqa memleket bazalyq kótermeleý tabystaryn berip turý kerek. Sol kezde ǵana baqytty adamdardyń qoǵamyn qalyptastyramyz» degen. Fınlıandııadan keıin mundaı eksperımentter búkil álemde ótkiziledi. Kenııanyń batysyndaǵy aýyldardyń birinde jasy 22-den asqan azamattar aı saıyn 22 dollar alyp turady eken. Bir qyzyǵy bul qarjy eldiń bıýdjetinen emes, halyqaralyq uıymdardyń esebinen tólenip turady. Italııa úkimeti de berige deıin «azamattyń bazalyq tabysy» atty jospar ázirlep, aı saıyn 150 eýro kóleminde bazalyq kóterme tabys berip turǵan.
Bazalyq tabystyń jaqtastary bul kedeılikpen kúresýge kómektesedi dep sanaıdy, óıtkeni adamdarǵa jumys izdeýge ýaqyt nemese jańa kásipti oqýǵa múmkindik beredi dep úmittenedi eken.
