- Rýslan joǵalǵan kúni bolǵan oqıǵalar anyqtaldy. Sol kúni kólge barǵandardyń bári karantın tártibin buzǵany úshin jaýapkershilikke tartyldy. Qazir olardyń adam joǵalýyna qanshalyqty qatysy bar ekeni tekserilip jatyr. Balyqqa shyqqandardyń arasynda eshqandaı janjal bolmaǵan. Biraq sol kúni bári ishimdik ishken. Rýslannyń qaıda ketkeni týraly qazirshe eshqandaı aqparat joq. Izdeý sharalary jalǵasýda, - dedi oblystyq PD tergeý basqarmasynyń basshysy Nurlan Arystanov.
Basqarma basshysynyń aıtýynsha, aýyl aınalasyndaǵy jáne kórshiles eldi mekenderdiń mańyndaǵy ózen-kólder men saı-salanyń barlyǵy, sondaı-aq, Ilııas Omarov aýylyndaǵy úı aýlalary, qudyqtar men bos ǵımarattardyń ishi tegis tekserilgen. Izdeýge tótenshe jaǵdaı departamentiniń súńgýir mamandary qosylyp, jaqyn mańdaǵy kólderdi túgeldeı súzip shyqqan. Biraq nátıje joq. Qazir polısııanyń jeke quramyna joǵalǵan azamattyń fotosýreti taratylyp, izdeý toby jasaqtaldy. Izdeý sharalaryna 25 polısııa qyzmetkeri, iz kesýshi ıt ertken 5 kınolog, 30-dan astam jergilikti turǵyn jáne 100-den astam erikti qatysýda.
Qostanaı oblysy
