Premer-Mınıstrdiń orynbasary atap ótkendeı, Qazaqstanda 2 aıǵa jýyq ýaqyt boıy tótenshe jaǵdaı jáne karantındik shekteý rejımi saqtaldy.
«Búginde qabyldanǵan sharalar, ıaǵnı shekteý sharalary tolyǵymen ózin ózi aqtady dep senimmen aıtýǵa bolady. Biz elimizde ınfeksııanyń taralýyn basqarylatyn deńgeıde saqtaı aldyq. Jaǵdaı Memleket basshysy Qasym-Jomart Kemelulynyń jeke baqylaýynda boldy», - dedi E. Toǵjanov.
Prezıdent málim etkendeı, 11 mamyrdan bastap elimizde tótenshe jaǵdaı rejımi aıaqtaldy. Alaıda, E. Toǵjanovtyń aıtýynsha, qaýip áli bar jáne qaterlerdi eskermeýge bolmaıdy. Sondyqtan karantın sharalary jalǵasady. Shekteý sharalary árbir óńirdegi epıdemıologııalyq ahýalǵa baılanysty kezeń-kezeńmen alynyp tastalady.
«Sizderge belgili bolǵandaı, karantın sharalaryn jeńildetýdi biz 20 sáýirden bastadyq. Osy kezeń aralyǵynda 1,1 mln jýyq adam jumysyn qaıta bastady. Búgingi kúnnen bastap aýmaǵy 2 myń sh.m. deıin bolatyn azyq-túliktik emes dúkender, sulýlyq salondary, balalardy damytý ortalyqtary jumysqa kirisedi. Saıabaqtar men gúlzarlarda adamdardyń serýendeýine ruqsat etiledi. Saıabaqtardyń janyndaǵy oıyn-saýyq qyzmetteriniń jumysy áli shekteledi», - dedi Premer-Mınıstrdiń orynbasary.
Sonymen qatar, sporttyq jattyǵýlar ótkizýge, mádenıet qyzmetkerlerine repetısııalar júrgizýge ruqsat etiledi. Jumys isteıtin ata-analar úshin balabaqshalarda sanıtarlyq normalardy saqtaýmen kezekshi toptar uıymdastyrylady.
E. Toǵjanovtyń aıtýynsha, kásipkerler men turǵyndardan saýda oıyn-saýyq ortalyqtarynyń, meıramhanalar men qonaq úılerdiń jumysyn qaıta bastaýǵa qatysty kóptegen suraqtar kelip túsýde.
«Bul kezeńde olardyń jumysqa kirispeıtinin erekshe atap aıtqym keledi. Bul másele óńirlerdegi sanıtarlyq-epıdemıologııalyq ahýaldy eskerýmen sál keıin qarastyrylatyn bolady», - dep túıindedi Premer-Mınıstrdiń orynbasary.
