Bizge taǵdyr 1991-2001 jyldar arasynda tájik-aýǵan shekarasynda burynǵy KSRO, qazirgi Táýelsiz Memleketter Dostastyǵynyń irgesin qorǵaýdy buıyrtypty. Osy bir beımaza aımaqta áskerı qyzmetin atqarǵan 250-deı burynǵy jaýynger 2016 jyly bas qosyp, «Tájik-aýǵan shekarasyndaǵy áskerı qımyldar ardagerleri men múgedekteri» Batys Qazaqstan oblystyq qoǵamdyq birlestigin qurdyq. Birlestik músheleri qarýlas dosymyz, 1995 jyly 7 sáýirde Pshıhevar shatqalynda bolǵan urysta qaza tapqan jerlesimiz Radık Qaımoldıevti árqashan maqtanyshpen eske alady. Shymkentte qurylǵan 6506 áskerı bólimniń jaýyngerleri kúshi áldeqaıda basym jaýmen 5 saǵat boıy arpalysyp, 17 bozdaq janyn qıdy. Sonyń biri – Batys Qazaqstan oblysynyń Shyńǵyrlaý aýdanynda týyp-ósken serjant Radık Qaımoldıev bolatyn. Osy erligi úshin Radık II dárejeli Aıbyn ordenimen nagradtaldy. Búginde onyń beınesi 29 aýǵandyq jaýyngermen birge Oral qalasyndaǵy Máńgilik alaý janynda, Jeńis alańyna ornatylǵan.
Shyny kerek, biz, tájik-aýǵan áskerı qaqtyǵysyna qatysqan jaýyngerler, osy kúndi kóp kúttik. Mine, endi Təjikstan-Aýǵanstan ýchaskesinde TMD shekarasyn qorǵaǵan əskerı qyzmetshiler ǵana emes, Iraktaǵy halyqaralyq bitimgershilik operasııaǵa bitimgerler retinde qatysqan, Taýly Qarabahtaǵy etnosaralyq qaqtyǵysty retteýge qatysqan əskerıler de ardager mártebesin aldy. Bul mártebe bizge túrli áleýmettik jeńildik qana bermeıdi. Eń bastysy – bizdiń mártebemiz ósti.
Qarýlas dostarymyzdyń bári de jańa Zańǵa erekshe rıza. Osy Zań arqyly endi biz memleket tarapynan arnaıy járdemaqy ala alamyz, biz de Aýǵan soǵysyna qatysqan ınternasıonalıst-jaýyngerlerge kórsetilip kelgen barlyq jeńildikti paıdalana alamyz. Bul degenińiz – turǵyn úı kezegi, salyq jeńildigi, tegin medısınalyq qyzmet, emdik-saýyqtyrý oryndaryna joldama ǵoı. Bizdiń aramyzda áli kúnge óz baspanasy joq kóp balaly otbasylar bar, endi olar jańa Zańnyń ıgiligin kóretin bolady.
Men ózim 1992 jyly Chapaev aýdandyq áskerı komıssarıatynan áskerge shaqyrylyp, Jarkenttegi №2091 áskerı bóliminde boryshymdy atqardym. 1993 jyly 1 qyrkúıekte 2 jeke atqyshtar batalony quramynda Dýshanbe qalasyna jettik. Odan ári Horog shekara bólimshesine, №6 zastavaǵa tústik. Osy jerde 4,5 aı kúzette bolyp, áskerı qaqtyǵystarǵa da qatystym. Sondyqtan men úshin «Áskerı qımyldar ardageri» mártebesin ıelený maqtanysh. Men eń aldymen qarýlas dostarym úshin, osy shekarada qanyn tókken, tipti janyn qıǵan bozdaqtar úshin qýandym.
Dárbek SÚLEIMENOV,
«Tájik-aýǵan shekarasyndaǵy áskerı qımyldar ardagerleri men múgedekteri» oblystyq qoǵamdyq birlestiginiń tóraǵasy
Batys Qazaqstan oblysy
