Ekonomıkanyń, bank salasynyń jaı-kúıi, respýblıkalyq bıýdjettiń atqarylýy jáne ekonomıka salalarynyń damýy týraly ulttyq ekonomıka mınıstri Rýslan Dálenov, Ulttyq bank tóraǵasy Erbolat Dosaev, Premer-Mınıstrdiń Birinshi orynbasary – qarjy mınıstri Álıhan Smaıylov, ındýstrııa jáne ınfraqurylymdyq damý mınıstri Beıbit Atamqulov, saýda jáne ıntegrasııa mınıstri Baqyt Sultanov, sondaı-aq energetıka mınıstri Nurlan Noǵaev baıandady.
Osy jyldyń qańtar-sáýirinde JIО́ 2019 jyldyń tıisti kezeńimen salystyrǵanda 0,2%-ǵa tómendedi. Saýda jáne kólik sektory teris dınamıka kórsetti, tıisinshe 8,9% jáne 11%-ǵa tómendedi. Sonymen qatar óńdeý ónerkásibinde ósim 7%-dy, mashına jasaýda – 25,4%-dy, jeńil ónerkásipte – 13,9%-dy, farmasevtıkada – 24,2%-dy, sondaı-aq taý-ken ónerkásibinde 6%-dy, qurylysta – 5,5%-dy, baılanys qyzmetterinde – 9,6%-dy, aýyl sharýashylyǵynda – 2,2%-dy qurady. Negizgi kapıtalǵa salynǵan ınvestısııalar 0,9%-ǵa ósti. Altyn-valıýta qory $30,5 mlrd, Ulttyq qor aktıvteri $58,5 mlrd qurady.
Úkimet basshysy elimizde tótenshe jaǵdaıdyń aıaqtalýy jáne karantındik sharalardyń jeńildetilýine baılanysty qyzmet kórsetý sektory qalpyna keltirile bastaýy tıis ekenin atap ótti. Buǵan salyqtyq yntalandyrý, jeńildikti nesıelendirý, otandyq taýarlardy ótkizýge kepildik berý tetigi arqyly ishki óndiristi qoldaý jolymen barlyq memlekettik qoldaý sharalary yqpal etedi.
Sonymen qatar Úkimet «Atameken» UKP jáne salalyq qaýymdastyqtarmen birlesip, iskerlik belsendilikti yntalandyrý, jumyspen qamtý jáne halyqtyń tabysyn qoldaý sharalaryn talqylady. Memleket basshysynyń tapsyrmasy boıynsha ázirlengen sharalardyń negizinde osy jyldyń sońyna deıin Ekonomıkalyq ósimdi qalpyna keltirý jónindegi keshendi jospar ázirlendi. Atalǵan jospar Úkimettiń kelesi otyrysynda qaralady.
Premer-Mınıstr qyzmet kórsetý sektoryn qalpyna keltirý boıynsha naqty sharalar qabyldaýdy tapsyrdy.
«Jalpy, aldaǵy kezeńdegi basym mindet ekonomıkanyń ózin-ózi qamtamasyz etilýin arttyrýǵa, básekege qabiletti shıkizattyq emes sektorǵa, tıimdi ınvestısııalar men qosylǵan qunnyń óńirlik jáne jahandyq tizbegine kirigýine negizdelgen jańa qurylymyn qalyptastyrý bolady», — dep túıindedi A. Mamın.
