Shyn máninde tótenshe jaǵdaıda jeke kásipkerlik pen bıznes salasy buryn-sońdy bolmaǵan daǵdaryspen betpe-bet keldi. Sondyqtan el ekonomıkasynyń negizgi ózegine aınalǵan óndiris oryndary men shaǵyn jáne orta bıznes salasyna memlekettik qoldaý odan ári jalǵasyn tappaq.
Memleket basshysynyń elimizdiń ındýstrııalandyrý salasyndaǵy saıasatty qaıta qarap, ony qazirgi álemdik naryq pen ishki naryqtyń suranysyna ıkemdeý týraly tapsyrmalar berýin óte mańyzdy sheshim dep bilemiz. Sondaı-aq memlekettik jáne kvazımemlekettik satyp alý júıesin otandyq ekonomıkalyq belsendilikti arttyrý quraly retinde paıdalaný kerek degen sheshimi de quptarlyq.
Prezıdent azyq-túlik qaýipsizdigi máselesi mańyzdylyǵyna erekshe toqtalyp ótti. Pandemııa ishki naryqty azyq-túlikpen qamtamasyz etýde ımportqa táýeldilikke jol berýge bolmaıtynyn aıqyn kórsetip berdi. Azyq-túlik – adamnyń basty qajettilikteriniń biri. Elimizde et, sút, un taǵy sol sııaqty halyq kóp tutynatyn taýar túrlerimen óz-ózimizdi tolyq qamtamasyz ete alatyndaı óndiris kólemi bar. Alaıda aýyl sharýashylyǵy ónimderin óńdeý máselesin tıisinshe jolǵa qoıa almaı kele jatqanymyz belgili. Bul – elimizdiń azyq-túlik qaýipsizdigine qater tóndiretin faktor. Qazaqstannyń aýylsharýashylyq óndiris keshenin damytý áleýeti asa joǵary. Sondyqtan Prezıdent aýyl sharýashylyǵy salasyna erekshe kóńil bólýde. Eń aldymen, bul salada keshendi strategııalyq baǵdarlamalar ázirlenip, júzege asyrylýy tıis. Ásirese aýyl sharýashylyǵy taýarlaryn óńdeý ónerkásibin damytýdy myqtap qolǵa alý qajet.
Aýyl sharýashylyǵy salasyna qoldaý budan ári arta túspek. Osy ýaqytqa deıin ekonomıkalyq aınalymnan tys, memlekettik baqylaý men qoldaýdan ada, óz betinshe damyp kele jatqan qosalqy shaǵyn sharýashylyqtar Ekonomıkalyq ósimdi qalpyna keltirý jónindegi memlekettik komıssııasy júzege asyratyn sharalar sheńberinde qolǵa alynatyn boldy. Osy arqyly aýyl sharýashylyǵy salasyndaǵy qanshama jyldan bergi kúrmeýi qıyn másele sheshimin tabady dep senemiz. Qosalqy shaǵyn sharýashylyqtardyń damýy aýyldardaǵy turǵyndardy jumyspen qamtý máselesine de oń áserin tıgizedi dep bilemiz.
Prezıdent Qasym-Jomart Toqaevtyń málimdemesi turǵyndardy áleýmettik qorǵaý, turǵyn úımen qamtamasyz etý, jumyspen qamtý, salyq júıesin ońtaılandyrý, qarjy salasyn retteý, bilim berý men ǵylymdy damytý sııaqty kúrdeli salalardaǵy ózekti máselelerdi qamtydy. Bir sózben aıtqanda, el azamattarynyń ómiri men densaýlyǵyn saqtaý, tabysyn arttyrý, bıznesti qoldaý jáne ony damytý, bilim jáne ǵylym júıesin jetildirý málimdemeniń negizgi ózegi boldy. Atalǵan salalardyń barlyǵynda oń ózgeristerge bastaıtyn naqty baǵdarlamalar iske qosylyp, el ekonomıkasynyń pandemııa týdyrǵan daǵdarystan keıin qalpyna kelip, qarqyndy damý jolyna túserine kámil senemiz. Memleket basshysy usynǵan ekonomıkany saýyqtyrý sharalary el bolashaǵynyń kepili bolary anyq.
Álı BEKTAEV,
«Aýyl» halyqtyq demokratııalyq partııasynyń tóraǵasy, Parlament Senatynyń depýtaty
