О́tken aptada Memlekettik komıssııa 4 mamyrdan bastap jumysyna kirisetin qyzmet túrleriniń tizimin bekitip, olardyń sanıtarlyq-epıdemııalyq qaýipsizdikti saqtaýy qatań baqylaýda bolatynyn aıtty. Nur-Sultan qalasyndaǵy «Danenov» tis emhanasy komıssııa bekitkendeı tek aldyn ala jazylýmen ǵana naýqastardy qabyldaı bastady. Tis dárigeri Tımýr Danenov ózderiniń de, klıentterdiń de qaýipsizdigi úshin sanıtarlyq normalardy erejege saı ustanyp otyrǵanyn jetkizdi.
«Eń aldymen mindetti túrde jazylý boıynsha qabyldaımyz. Qabyldaýdan buryn olardyń temperatýrasyn ólsheımiz. Klınıkaǵa jazylǵan ýaqyttan buryn kelmeýin talap etemiz. Sondaı-aq olar mindetti túrde maskamen jáne qolǵappen kelýi kerek. Eń aldymen ótkir jáne irińdi tis aýrýlaryn qabyldaýǵa tyrysamyz. Bizde bir tósektiń aýmaǵy 14 sharshy metr bolýy kerek. Al ekinshi tósekke de pasıent qabyldaıtyn bolsa, taǵy 7 sharshy metr aýmaqty artyǵymen qosamyz. Barlyq qural-jabdyqtarymyz sanıtarlyq-epıdemııalyq talaptarǵa saı, ár qoldanylǵan saıyn dezınfeksııalanady. Al ózimiz tek bir ret qoldanylatyn qolǵaptardy qoldanamyz. Klınıkaǵa kún saıyn dezınfeksııa jasaımyz. Úsh saǵat saıyn kvars qosamyz», degen T.Danenov karantın kezinde tótenshe jaǵdaıǵa baılanysty berilgen 42500 teńge tólemaqyny alǵanyn, qıyn sátte memlekettiń kórsetken kómegine dán rıza ekenin aıtty.
Ásirese karantın kezinde qyryq kún boıy shash qysqartpaǵan er azamattardyń shashtarazǵa óte zárý bolǵany anyq. Sondyqtan da «Hanshaıym» sán salonynyń shashtarazshysy Erbolat Sársenbaı birinshi kúnnen bastap-aq klıentterdiń óte kóp bolǵanyn aıtady. Degenmen tabysty kóbirek tabamyz dep sanıtarlyq talapty buzýǵa bolmaıdy.
«Buryn da klıentterdi tek aldyn ala jazylýmen qabyldaıtynbyz. Qazir bir-birine kedergi bolmaýy úshin qabyldaýdyń ýaqytyn sál uzarttyq. Sanıtarlyq erejelerdi qatań ustanamyz. Salonda oryndyqtardyń aralyǵy bir jarym metrden ornalastyrylǵan. Klıentterdiń maska, qolǵap kııýin mindetti túrde talap etemiz. Kúndelikti saǵat 10:00-den 16:00-ge deıin ǵana jumys isteımiz. Jazylýshylar kúnine on adamnan artylmaıdy. Sońǵy kisini qabyldap bolǵansha shekti ýaqyt ta aıaqtalady. Qazirdiń ózinde kisiler 4-5 kúnge aldyn ala jazylyp qoıdy. Árbir sheberde antıseptık bar. Qol ustasyp amandaspaımyz. Bas jýǵanǵa jáne shash alǵanǵa jeke-jeke bir rettik qolǵaptardy paıdalanamyz. О́zimiz de tek maskamen júremiz. Ár klıentti qabyldaǵan saıyn qural-saımandarymyzdy dezınfeksııalaımyz. Ýaqytymyz da shekteýli bolǵandyqtan qazir negizinen er kisilerdi ǵana qabyldap jatyrmyz», deıdi E.Sársenbaı.
