Kodeks jobasy jóninde baıandama jasaǵan Májilis depýtaty Záýresh Amanjolova depýtattar engizgen túzetýler densaýlyq saqtaý júıesin zańnamalyq turǵydan jaqsartýǵa baǵyttalǵanyn aıtty.
Atalǵan qujat boıynsha jumys tobynda múddeli mınıstrlikter men vedomstvolardyń, medısınalyq jáne ǵylymı qoǵamdastyqtyń, úkimettik emes qoǵamdyq birlestikterdiń ókilderi men táýelsiz sarapshylardyń qatysýymen 1200 usynys qaralǵan. Nátıjesinde 717 túzetý qabyldanyp, 2 túzetý qabyldanbaǵan.
Qabyldanbaǵan túzetýlerdiń biri profılaktıkalyq ekpeler júrgizýdi «mindetti» degen sózdi «quqyly» dep ózgertý týraly bolsa, ekinshisi ekpe jasalmaǵan balalardyń balabaqshalarǵa barýyn tyıatyn normalardy alyp tastaý jóninde boldy.
Májilis depýtaty Záýresh Amanjolova bul máseleni jumys tobynyń músheleri jan-jaqty zerdelegenin, sondaı-aq halyqaralyq tájirıbe eskerilgenin atap ótti. Nátıjesinde barlyq ekpe mindetti jáne erikti bolyp naqty bólinedi. Al balalardyń balabaqshaǵa barýy «ujymdyq ımmýnıtettiń» deńgeıine baılanysty júzege asyrylady.
Bul túzetýlerdi engizýdi depýtat Bekbolat Tileýhan usynǵan edi. Ol otyrys barysynda májbúrli ekpege qarsy ustanymynda qalatynyn ańǵartty, biraq bul túzetýlerdi depýtattardyń kópshilik daýsyna salýdy suraǵan joq.
