Prezıdenttiń málimdemesi boıynsha qazirdiń ózinde 1 mıllıon 100 myńnan astam azamat jumysqa shyqqan. Elimizde dúkender, sán salondary, bilim ortalyqtary ashylady, basqa da nysandardyń qyzmeti qaıta jandanýda. Jolaýshylarǵa arnalǵan áýe tasymalynyń jumysy qalpyna kelýde.
Búgingi kúni Eńbek jáne halyqty áleýmettik qorǵaý mınıstriniń aqparatyna sáıkes, jalpy 4 mln 539 myń adam tótenshe jaǵdaı engizilgenge deıin jumys istegen, alaıda TJ engizilýine baılanysty tabysynan aıyrylǵan azamattarǵa beriletin ótemaqyny alǵan, oǵan barlyǵy 193 mlrd teńge jumsalǵan. Úkimettiń habarlaýynsha, 1 mıllıonnan astam azamatqa azyq-túlik pen turmystyq zattar úlestirilgen. Kommýnaldyq tólemderdiń tarıfi tómendetilgen. Kommýnaldyq tólemderdi tóleý úshin asa muqtaj jandardyń qosymsha kómek alýy jalǵasyn tabýda. Bankter tarapynan 2 mıllıonǵa jýyq azamattyń nesıe tóleý merzimi keıinge shegerilgeni belgili boldy. Memleket tarapynan qoljetimdi nesıe berý, kóktemgi egis naýqanyn júrgizý, jumys oryndaryn ashý jáne saqtaý úshin aıtarlyqtaı qarajat bólinip jatyr. 700 myńnan astam kompanııa men kásipkerler úshin salyq júktemesi azaıtylǵany óte oryndy dep sanaımyn. Úkimettiń jospary boıynsha 2020 jyly 1 mln 200 myńnan astam adam jumyspen qamtylatyn bolady. Bul jaqsy jańalyqtardyń biri dep sanaımyn.
Prezıdent Qasym-Jomart Toqaev komıssııa otyrysynda bilim berý baǵdarlamalarynyń mazmunyn qaıta qarap, olardy qoljetimdi jáne ınteraktıvti etý qajettigin, muǵalimderdiń daıyndyǵy jańa talaptardy eskere otyryp júrgizilýi kerektigin jetkizdi. Prezıdenttiń aıtýynsha, bilim berý áldeqaıda ıkemdi bolýy kerek. Memleket basshysy balalar men stýdentterdi qashyqtan oqytýdyń hattamalary men ádisterin jasap, eldegi barlyq oqý oryndaryn naqty sıfrlandyrýdy aıaqtaý qajettigine toqtaldy.
Prezıdentimiz osy qıyn kezeń ótkennen keıin de densaýlyq saqtaý júıesine qatysty barlyq máselelerdi qaıta qarap, aldaǵy jaǵdaılarǵa daıyn bolýymyz kerektigine mán berdi, Úkimetke naqty mindetter qoıdy. Osyǵan oraı Úkimet janynan bedeldi ǵalymdar men sarapshylardan quralǵan bıologııalyq qaýipsizdik boıynsha ǵylymı keńes qurylatyny belgili boldy.
Sonymen qatar Úkimet laıyqty eńbekaqy tóleý men qarjy-salyq júıesin rettep, jemqorlyqty aýyzdyqtaýǵa barynsha kúsh salý kerek. Qazyna qarjysyn bolashaǵy bulyńǵyr áleýmettik baǵdarlamalardy iske asyrýǵa emes, halyqtyń turmys deńgeıin kóterýge, ómir súrý sapasyn arttyrýǵa jumsaý qajet.
Murat BAQTIIаRULY,
senator, Áleýmettik-mádenı damý jáne ǵylym komıtetiniń tóraǵasy
