Beıbit jınalystardy uıymdastyrý jáne ótkizý tártibi týraly zań jobasy jóninde Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń múshesi Sársenbaı Eńsegenov baıandama jasady. Ol bul qujattyń Prezıdent Qasym-Jomart Toqaevtyń halyqqa Joldaýynda kórsetilgen mıtıngter týraly zańnamany jetildirý tapsyrmasyna sáıkes ázirlengenin atap ótti.
– Bas komıtet Senattyń zańnama, redaksııalyq-baspa bólimderimen birlese otyryp Zań jobasynyń jekelegen baptaryna ózgerister men tolyqtyrýlar engizý qajet degen toqtamǵa keldi. Komıtet Zań jobasyndaǵy alty bapqa baılanysty 16 usynysty oryndy dep sanap, olardy salystyrmaly kestege engizip, nazarlaryńyzǵa usynyp otyr. Bul usynystardyń bir toby Zań jobasynyń 5 baby 2-shi tarmaǵyndaǵy beıbit jınalysty uıymdastyrýshynyń mindetteri men osy baptyń 3-shi tarmaǵyndaǵy beıbit jınalystar ótkizý kezinde tyıym salý negizderin qamtıtyn, sonymen birge 6 baptyń 3-shi tarmaǵyndaǵy beıbit jınalysqa qatysýshynyń áreketine tyıym salý týraly tarmaqtarǵa qatysty. Mysalǵa: Zań jobasynda uıymdastyrýshyǵa beıbit jınalystar ótkizý kezinde beıbit jınalysqa qatysýshylardan óz betin búrkemeýdi, onyń ishinde bet álpetin tanýǵa kedergi keltiretin kıim-keshekti jáne ózge de zattardy paıdalanýdy talap etýge mindet qylyp júktegen. Sol sııaqty, beıbit jınalysty ótkizý kezinde uıymdastyrýshyǵa bet álpetin tanýǵa kedergi keltiretin kıim-keshekti jáne ózge de zattardy paıdalanýǵa tyıym salý belgilengen. Komıtet uıymdastyrýshyǵa mindettelip otyrǵan bul normalardy alyp tastaýdy usynady. Bul belgili bir deńgeıde beıbit jınalysqa qatysýshylardyń densaýlyǵyn saqtaýǵa baılanysty jeke qorǵanysh quraldaryn paıdalaný quqyǵyn shekteıdi, – dedi Sársenbaı Eńsegenov.
