Eraly Toǵjanovtyń málim etýinshe, qazir elimizdegi koronavırýs ınfeksııasynyń tirkelý deńgeıi 2-3 paıyzdy qurap otyr. Bul kórsetkish Memleket basshysy Qasym-Jomart Toqaevtyń tapsyrmasymen qabyldanǵan naqty sharalardan keıin tómendep keledi.
Alaıda, Atyraý oblysynyń ákimi Mahambet Dosmuhambetovtiń aıtýynsha, aımaqtaǵy epıdemıologııalyq jaǵdaı áli de turaqtala qoıǵan joq. Qazirgi kezde óńirde COVID-19 ınfeksııasyn juqtyrǵan 458 jaǵdaı tirkeldi. Naýqastardyń 127-si emdelip shyqty. Al, «Teńiz» kenishiniń 384 jumysshysynan atalǵan vırýs anyqtaldy. Bul azamattar –20 jataqhanada turatyn 33 mekemeniń qyzmetkerleri. «Teńiz» kenishinen 17 myń adam turǵylyqty mekenjaılaryna jetkizildi.
Densaýlyq saqtaý mınıstri Eljan Birtanovtyń aıtýyna qaraǵanda, «Teńiz» kenishinde karantındik talaptar jetkilikti deńgeıde saqtalmaı otyr. Osyǵan oraı mınıstr «Teńizshevroıl» JShS-niń merdiger jáne sýbmerdiger kompanııalary basshylarynyń jaýapkershiligin arttyrýǵa shaqyrdy.
Jıyn barysynda «Jumyspen qamtý jol kartasy – 2020» baǵdarlamasyn óńirde júzege asyrý barysy da qaraldy. Úkimet bıyl 1 mıllıon 220 myń adamdy jumyspen qamtýdy josparlap otyr. Atyraý oblysynda bul baǵdarlama sheńberinde 63 joba júzege asyrylyp, 7 myńnan astam jumys orny ashylady. Oǵan respýblıkalyq bıýdjetten 35 mlrd. 308 mln. teńge bólinip otyr.
Jıyndy qorytyndylaǵan Premer-Mınıstrdiń orynbasary Eraly Toǵjanov epıdemıologııalyq ahýaldy baqylaýda ustaý, «Jumyspen qamtý jol kartasy – 2020» baǵdarlamasyn tıimdi júzege asyrý men jumyspen qamtamasyz etýge qatysty birqatar tapsyrmalar berdi.
