Baıqaýdyń negizgi maqsaty – 29 eldiń, onyń ishinde Qazaqstan Respýblıkasynyń ýnıversıtetteri stýdentteriniń, zertteýshileriniń jáne oqytýshylarynyń shyǵarmashylyq sheshimderin jasandy ıntellekt (JI) negizinde bilim berý salasyna engizý. Sýleıman Demırel Ýnıversıtetiniń (Kaskelen q., Qazaqstan) stýdentteri men magıstranttarynan quralǵan komanda baıqaýǵa qatysyp, ekinshi irikteý kezeńinen keıin fınalǵa shyqty.
4 adamnan quralǵan komanda «Emtıhandardy basqarýdyń jetildirilgen júıesi» («Advanced Examination Management System») veb-qosymshasyn ázirledi. Qosymsha arqyly pedagogtar emtıhan úderisin basqara alady (keńeıtilgen redaktory bar suraqtar men jaýaptar qyzmetin qoldanyp) jáne onlaın-emtıhandar qabyldaı alady. Emtıhan kezinde veb-qosymsha arqyly terezeler arasynda aýysý, kóshirý jáne kiristirý sııaqty braýzerdiń qoldaný belsendiligin qadaǵalaýǵa bolady. Sondaı-aq fokýsty, emosııalar men qyzyǵýshylyqty baqylaýǵa bolady. Sonymen qatar, júıe oqytýshyǵa emtıhan kezinde stýdenttiń is-áreketi turaly habardar bolýǵa múmkindik beredi. Júıe plagıatty anyqtaý jáne onlaın emtıhan kezinde basqa kúdikti áreketterdi boldyrmaý úshin arnaıy qyzmetimen jabdyqtalǵan. Qosymsha arqyly emtıhan aıaqtalǵannan keıin jınalǵan málimetterdi (trekerlerden) mashınamen oqytý algorıtmderin paıdalana otyryp taldaýǵa, usynymdardy daıyndaýǵa jáne oqýshylardyń úlgerimin qadaǵalaýǵa bolady.
«Joba ıdeıasy maǵan nusqaýshynyń kómekshisi bolyp jumys istep, onlaın-vıktorınany ótkizgen kezde keldi. Sol kezde men aqyly plagındi qoldandym, biraq úmitterim aqtalmady, onlaın emtıhandarmen meniń eksperımentim sátsiz bolyp shyqty. Sondyqtan men úshin emtıhandy baǵalaýǵa baılanysty qaǵaz jumysyn azaıtýǵa jáne kóshirýdi anyqtaı olatyn platformany ázirleý óte qyzyqty boldy. Osy baıqaýda biz komandamen «The next AI Guardians» baıqaýyna óz konsepsııamyzdy usynyp, fınalǵa óttik» - dep komandanyń múshesi Qurmanǵazy Kongratbaev óz áserimen bólisti.
Irikteý kezeńinde qazaqstandyq komanda Norvegııalyq qatysýshylarǵa keńes bergen Microsoft-tyń tálimgerimen úzdiksiz jumys istedi. Onyń kómegimen komanda jobanyń tehnıkalyq bólimin daıyndap, tıimdi bıznes-modeldi quryp, óziniń básekelestik artyqshylyqtaryn baǵalap, naryqqa shyǵý strategııasyn qalyptastyrdy. Microsoft-tyń qazylar alqasyn konsepsııamen tanystyrý onlaın rejımde ótti, nátıjesinde komanda fınalǵa shyqqan alty úzdik komanda qataryna kirdi.
Qazir komanda músheleri fınalǵa daıyndalyp jatyr, tálimgermen apta saıyn onlaın keńesip, baıqaýdyń fınalynda jeńiske jetýdi josparlap otyr.
AI University Virtual Bootcamp fınaly 2020 jyldyń 18 maýsymynda ótýi tıis edi. Alaıda, qazirgi jaǵdaılarǵa baılanysty is-shara onlaın formatqa kóshiriledi. Fınaldyń kúni men ýaqyty belgilengende, barlyq 6 komanda jobalaryn onlaın rejımde qorǵaıdy.
«Biz qazaqstandyq komandanyń osy baıqaýdaǵy jetistikterin maqtan tutamyz. Biz qorytyndy kezeńniń bir bóligi retinde josparlanǵan eki kúndik hakatondy áli de ótkize alamyz dep úmittenemiz, qazir ol jaǵdaı jaqsarǵanǵa deıin belgisiz merzimge keıinge qaldyryldy. Sol kezde barlyq alty komanda Majarstanda, Býdapesht qalasynda ótetin fınalǵa qatysa alady. Uıymdastyrýshylar barlyq qatysý jónindegi shyǵystardy ózine alady», – dep «Microsoft Qazaqstan» kompanııasynyń bilim berý sektorynyń jetekshisi Nurlan Janybek atap ótti.
