Mýzeı kúni dırektordyń orynbasary Ásemgúl Qydybekova ózderiniń jańa jobalarynyń josparlarymen tanystyrdy jáne ujym múshelerin merekelerimen quttyqtady. Onyń aıtýyna qaraǵanda aǵylshyn tilinde júrgiziletin ekskýrsııalar arqyly sheteldikterdiń Abylaı hannyń ómiri men isine degen qyzyǵýshylyqtary arta túsýge tıis. Qazir Soltústik Qazaqstan ýnıversıtetinde oqıtyn sheteldik jastar birshama kóp, onyń ústine qala qonaqtary da karantınnen keıin kóbeıeri sózsiz.
Oblystyq polısııa murajaıy da kásiptik merekesin erekshe tártipte atap ótti. Bul kúni betperde kıgen kórermenderge polısııa áýletteriniń urpaqtary ózderiniń atalary men ákeleri tapsyrǵan eksponattardyń tarıhy týraly baıandap berdi. Solardyń biri, Qyzyljar aýdany polısııa bólimi bastyǵynyń orynbasary, polısııa maıory Bahtııar Esimov bir otbasydan shyqqan úshinshi urpaq. Onyń atasy Ǵazız Esimov 1951 jyly 21 maýsym kúni qyzmettik mindetin atqarý kezinde qaıtys bolypty. Ol demalys saıabaǵynda qyzǵa shabýyl jasaǵan buzaqylardy ustaý kezinde moınynan pyshaq jaraqatyn alǵan. Nebári 25 jasta bolǵan onyń esimi áriptesteriniń esinde máńgige qalyp, 2016 jyly SQO PD ákimshilik ǵımaratynyń janynda ashylǵan jas qyzmetkerlerdiń alleıasyna onyń esimi berilgen eken. Al B.Esimovtyń ákesi polısııa maıory sheninde otstavkaǵa shyqqan. Endi Bahtııar onyń da jeke zattaryn mýzeıge ótkizbek.
SQO PD bastyǵy polısııa polkovnıgi Marat Tólebaev mýzeı qoryn saqtaýshylardy jyly quttyqtap, qyzmetkerlerdiń patrıottyq sezimderin arttyrýdaǵy qajyrly eńbekterine alǵys bildirdi. Mýzeı basshysy Lıýbov Osınskaıa PD mýzeıiniń jetistikteri, IIM júıesindegi úzdikterdiń biri atanýy jeke quramnyń qosqan zor úlesi ekendigin atap ótti. Polıseıler men ardagerlerdiń týystary eksponattar jaıly óz oılaryn ortaǵa saldy.
Soltústik Qazaqstan oblysy
