«On eki aıdyń sultany bolǵan Ramazannyń alǵashqy on kúni Allanyń rahymy túsip turady, ekinshi on kúninde keshirimi bolsa, sońǵy on kúndiginde oraza ustaǵan jandy tozaq otynan qutqaratyn berekeli de keshirimi mol aı. Ramazannyń osy sońǵy onkúndiginde 83 jyl 4 aıǵa týra keletin bir tún bar. Osy túnde adam balasy kóbirek jaqsylyq jasap, izgi amaldardy atqarýǵa tyrysady. Ramazan – jumaqtyń esigi aıqara ashylatyn, ımandy kúsheıtýge múmkindik berilgen aı. Bul – Jaratýshy Iemizdiń uly syıy ári nyǵmeti. Bir jylda on bir aı boıy kir shalyp, tot basýǵa az qalǵan rýh pen júrektiń qaıta tazaryp, kemeldenýi úshin Qudaı Taǵalanyń arnaıy bekitken kıeli baǵdarlamasy.
Qadir túni – jaı ýaqytta jasaǵan jaqsylyqtar men salıqaly amaldardyń saýabynyń 700 esege deıin eselenip jazylatyn qutty túni. Sondyqtan bul túnde bar ıgilik ıeleri jaqsylyq jasaýda ózara alaman báıgege túsedi. Musylman úmbeti bul aıdy saryla kútip, saǵynyshpen qarsy alady. «Kelesi jyly bul qasıetti aımen qaıta qaýyshýǵa ǵumyrym jete me, joq pa?» degen qımas sezimdermen shyǵaryp salady», dedi bas ımam. Sonymen qatar ol orazanyń úlken sabyr mektebi ekenin de aıtyp ótti. О́z sózinde Beıbit Myrzageldıev atalǵan túnge daıyndyq sharalary oblystyq jáne aýdandyq meshitterde júrgizilip jatqanyn, kópbalaly, jalǵyzbasty analarǵa jáne áleýmettik jaǵdaıy tómen otbasylarǵa qaıyrymdylyq jasalyp, halyqtyń yntymaǵyn arttyrý maqsatynda ýaǵyz-nasıhattar júrgiziletinin jetkizdi.
Jambyl oblysy
