Jaqynda Batys Qazaqstan oblysy boıynsha Sybaılas jemqorlyqqa qarsy qyzmet basshysy Rýstam Aqmyrzaev Bórli aýdandyq taýarlar men kórsetilgen qyzmetter sapasy men qaýipsizdigin baqylaý basqarmasynyń laýazymdy tulǵasyna qatysty qylmystyq is boıynsha engizilgen usynysty qarady. Ol qyzmetker jańa jyl qarsańynda jeke tulǵadan kámpıt, tort túrinde tátti syılyq jáne ishinde ne bary belgisiz konvert alǵan. «Qyzmetker syıaqydan bas tartpaǵan, osylaısha jeke tulǵa tarapynan zańsyz áreket jasaýǵa jaǵdaı týdyrǵan», - deıdi antıkor mamandary.
Qylmystyq isti tergeý barysynda álgi qyzmetkerdiń bıznes ókilimen qyzmetten tys baılanysy da baıqalǵan. Iаǵnı qyzmetker men kásipker kezdesip, ózara qaǵazǵa jazyp sóılesipti. «Bul kásipkerdiń bıznes qyzmetin jandandyrý úshin múddesin qorǵaıtyndaı áreket bolýy múmkin», - deıdi tergeýshiler.
Árıne, naqty dálelder bolmaǵandyqtan qylmystyq is toqtatyldy. Alaıda laýazymdy tulǵanyń is-áreketinde óziniń qyzmettik jaǵdaıyn paıdalaný belgileri baıqalyp tur.
- Mekeme basshylyǵy tarapynan baǵynysty qyzmetkerlerine sybaılas jemqorlyqtyń aldyn alý boıynsha tıisti deńgeıde baqylaýdyń joqtyǵy, ákimshilik ǵımaratynda kelýshiler men qyzmetkerlerdiń erkin kezdesýi, baılanysa alýy, sondaı-aq kelýshilerdiń kúmándi zattarmen ótkizbeýge jaýapty tulǵanyń óz qyzmetin oryndamaýy joǵaryda kórsetilgen faktilerdi jasaýǵa jol bergen, - deıdi Rýstam Aqmyrzaev.
Osylaısha Bórli aýdandyq taýarlar men kórsetilgen qyzmetter sapasy men qaýipsizdigin baqylaý basqarmasynda sybaılas jemqorlyqtyń aldyn alý jumystary jetkiliksiz dep tanyldy. Keleńsiz jaǵdaıda kózge túsip, memlekettik qyzmetke kir keltirgen qyzmetkerdi jumystan bosatý, al onyń basshysyn tártiptik jaýapkershilikke tartý usynyldy.
Batys Qazaqstan
