Daýdyń basy da dál osy onlaın nesıeden bastalyp otyr. «San soǵyp, barmaq tistep» qalǵandardyń sany artqandyqtan bul máselege memleket aralasýy tıis boldy. Sóıtip, buǵan deıin ekinshi deńgeıli bankterge ǵana qoldanylyp kelgen jyldyq mólsherleme 56 %-dy quraýy tıis degen meje barlyq shaǵyn qarjy uıymdaryna jappaı engizilip otyr. Bul ózgeriske shaǵyn qarjy uıymdarynyń óz ýáji bar.
̶ Ekinshi deńgeıli bankter qoldanatyn arnaıy formýla bar. Bul keste shaǵyn qarjy uıymdaryna arnalmaǵan. Barlyq shyǵyndardy esepke alatyn bolsaq, shema boıynsha jyldyq mólsherleme 56 %-dy emes, 46 %-dy quraıdy. Únemi memlekettiń qoldaýyna zárý ekinshi deńgeıli bankterdiń qarjy aınalymy shaǵyn uıymdarmen salystyrǵanda áldeqaıda joǵary ekeni aıtpasa da túsinikti. Jalpy alǵanda elimizde 2 jarym myńdaı lombard bar desek, zańdaǵy jańa ózgeriske sáıkes sonyń 60 %-y endi «kóleńkeli bıznespen» aınalysýǵa kóshedi. Bul degenimiz memleketke túsetin salyq kemıdi degen sóz. Atalǵan salada 3 myńǵa jýyq adam jumys isteıtini taǵy bar. Osy rette, neǵurlym shaǵyn qarjy uıymdarynyń sany az bolǵan saıyn ony qadaǵalap otyrý tıimdi degen qaǵıdaǵa kelispeımin. Aǵashtyń eki ushy baryn umytpaýymyz kerek. Bizden qaryz alatyndardyń basym bóligi shaǵyn jáne orta kásipkerlikpen aınalysatyndar. Olardyń aı saıyn alatyn turaqty tabysy joq. Osy máseleni negizge alyp bankter olarǵa nesıe bermeıdi. Al bizden alǵan qarajatyn tabysy qaı ýaqytta túsedi, sol ýaqytta jabýyna qolaıly jaǵdaı jasalǵan edi. Jańa talap boıynsha zeınetaqy qoryna aqsha aýdaımaıtyn, turaqty tabysy joq klıentterimizden aıyrylyp qalaıyn dep turmyz, - deıdi TAS GROUP kompanııalar tobynyń zań departamentiniń dırektory Maqsat О́serbaev.
