Qazaqstan • 21 Mamyr, 2020

Ashat Aımaǵambetov: Abaı murasyn álem ıgiligine aınaldyrý – paryzymyz

441 ret kórsetildi

Halyqaralyq Túrki akademııasy (TWESCO) uly oıshyl Abaıdyń 175 jyldyq mereıtoıyn halyqaralyq deńgeıde atap ótý maqsatynda onlaın konferensııa ótkizip jatyr. Sharaǵa Bilim jáne ǵylym mınıstri Ashat Aımaǵambetov qatysty. Mınıstr Abaı murasyn zerttep, túbi bir túrki jurtyna jáne álem ıgiligine aınaldyrý barshamyzdyń ortaq paryzymyz ekenin atap ótti.

«Uly oıshyl, aqyn Abaı Qunanbaıulynyń 175 jyldyǵyna arnalǵan halyqaralyq onlaın konferensııa jumysyna qosh keldińizder. Prezıdent Qasym-Jomart Toqaevtyń jarlyǵymen bıyl Abaıdyń 175 jyldyq mereıtoıy memlekettik deńgeıde atalyp ótilýde. Bul mereıtoı IýNESKO sheshimimen halyqaralyq keńistikke shyqqan edi. Sonymen qatar, qańtar aıynda Bakýde Túrki akademııasyna múshe memleketterdiń Bilim mınıstrleri bıyl uly Abaıdy baýyrlas elderde keńinen nasıhattaý týraly sheshim qabyldady. Búgingi jıyn sonyń jarqyn kórinisi dep oılaımyn. Barlyq áriptesterime alǵys aıtqym keledi», - dedi mınıstr Ashat Aımaǵambetov.

Mınıstr Abaı qazaq halqy úshin rýhanı ustaz, ult mádenıeti men ádebıetiniń bıik shyńy ekenin atap ótti. «Adamzattyń bárin súı baýyrym dep» ulaǵatty urandy tý etip kótergen gýmanıst aqyn qazaq halqyna adaspaıtyn mol mura qaldyrdy.

«Búginde Abaı shyǵarmalary dúnıejúzine tanymal. Aqyn murasy álem mádenıeti qazynasynyń ajyramas bir bóligine aınaldy. Osy oraıda Túrki akademııasynyń bastamasymen Abaı shyǵarmalary ázerbaıjan, qyrǵyz, ózbek jáne túrik tilderine aýdaryldy. Osylaısha Abaı murasy barsha túrik halyqtarynyń ortaq qazynasyna aınaldy deýge bolady. Túrki akademııasyna ıgi bastama úshin óz atymnan, mınıstrlik atynan alǵys bildirgim keledi. Bul oraıda Abaı murasyn zerttep, zerdelep, bolashaq urpaqqa dáripteý túbi bir túrki jurtyna jáne álem ıgiligine aınaldyrý –  barshamyzdyń ortaq paryzymyz. Bıyl Bakýde bastalǵan ıgi sharalar jalǵasyn taýyp, túrki memleketteriniń astanalarynda Abaıdyń 175 jyldyǵyna is-sharalar júıeli ótetin bolady. Bul sharalardyń Túrki akademııasynyń on jyldyǵymen oraılas kelýi ıgilikti isterge serpin beretin bolady dep senemin. Akademııany alǵashqy belesimen quttyqtaı otyryp, konferensııa jumysyna sáttilik tileımin», - dedi mınıstr.

Sońǵy jańalyqtar

Tórt klýb top bastap tur

Fýtbol • Búgin, 00:00

Ezop pen Abaı

Rýhanııat • Keshe

Shyndyq pen ótirik

Qazaqstan • Keshe

Aıbardyń armany

Rýhanııat • Keshe

Túrkistanǵa 3000 jyl

Rýhanııat • Keshe

Uqsas jańalyqtar