Jetisý aýdanynda Jasyl Almaty jobasy boıynsha 20 myń aǵash otyrǵyzylady.
Jáne Jetisý aýdanynda 12 gúlzar abattandyrylady.
Qala ákimi «Kókjıek» jáne «Kókmaısa» shaǵynaýdandaryndaǵy skverlerde, Qazybaev kóshesindegi jaıaý júrginshiler aımaǵynda, sondaı-aq №169 jáne №171 balabaqshalarda júrgizilip jatqan jóndeý jumystarynyń sapasyna baǵa berdi. Abattandyrý jáne kógaldandyrý jumystary – qala ákimimen ótetin kezdesýlerde turǵyndardyń jıi kóteretin máseleleriniń biri bolatyn.
Baqytjan Saǵyntaev qala turǵyndarynyń demalysy men ekologııany saýyqtyrý úshin qolaıly jaǵdaı jasaý qajettigine nazar aýdardy. Jetisý aýdanynda kóptegen qoımalar, ónerkásiptik kásiporyndar ornalasqan. Osyǵan oraı, turǵyndardyń ótinishterine sáıkes, kógaldandyrý jáne belsendi demalýǵa arnalǵan oryndar qurý boıynsha sharalar kúsheıtildi. Eger 2019 jyly 7 skver men 1 saıabaq aýdan turǵyndarynyń ıgiligine berilse, aǵymdaǵy jyly 12 skverdi abattandyrý josparlanýda.
Baqytjan Saǵyntaev rekreasııalyq aımaqtardy ǵana emes, sondaı-aq oǵan irgeles aýmaqtarǵa da kóńil bólýdi, ıaǵnı, keshendi tásildi qamtamasyz ete otyryp, retke keltirýdi tapsyrdy. Bul rette otandyq óndiristiń zamanaýı úlgidegi uzaq merzimdi materıaldaryn paıdalanýǵa tıistigin atady.
«Turǵyndardyń suranystaryna sáıkes ómir súrý, nátıjeli jumys jáne belsendi demalys úshin jaǵdaıdy jaqsartýdy jalǵastyramyz. Bul erekshe mıkroklımat, qalalyqtardyń ómir súrýi men kóńil-kúıine oń áser etedi», - dep atap ótti qala ákimi.
Jańa jobalardy qaraý kezinde Jetisý aýdanynyń ákimi Maqsat Qıqymov qala ákiminiń Jasyl Almaty bastamasyn júzege asyrý aıasynda jasyl qordyń jaǵdaıyn jaqsartý úshin mıllıonǵa jýyq aǵash otyrǵyzý boıynsha júrgizilip jatqan jumystar týraly baıandady.
Aýdanda 220 myń aǵash bar, onyń 5 myńy sońǵy 3 jylda otyrǵyzyldy. Tekserý nátıjesinde ótken jyly otyrǵyzylǵan 1 myńǵa jýyq kóshettiń óspeı qalǵany anyqtaldy. Sondyqtan kelisim-shart talaptaryna sáıkes merdiger uıymdar kúzde 2 myń kóshet otyrǵyzady. Sonymen qatar, Jasyl Almaty baǵdarlamasy aıasynda kúzde Jetisý aýdanynda taǵy 20 myń aǵash otyrǵyzylady.
Jalpy, Jetisý aýdanynda 2019 jyly aýla aýmaqtaryn jaryqtandyrý jumystary 60%-dan 88%-ǵa deıin oryndaldy. Bıylǵy jyly bul jumystyń kórsetkishin 100% jetkizý josparlanýda. Polısııanyń patrýldik-bekettik qyzmetin jandandyrýmen qatar aýmaqtardy abattandyrý jáne jaryqtandyrý boıynsha qabyldanyp jatqan sharalar qoǵamdyq qaýipsizdiktiń jaı-kúıine jaǵymdy áser etti. Jetisý aýdanynda tirkelgen quqyq buzýshylyq deńgeıi 45,9%-ǵa nemese 993 qylmysqa tómendedi.
