Bokstan Bolgarııanyń Albena qalasynda qyrkúıektiń 22-sinen beri ótip jatqan jas jáne jasóspirim qyzdar arasyndaǵy álem chempıonatynda qazaqstandyq boıjetkender óte jaqsy óner kórsetýde.
Keshe túnde munda jasóspirim qyzdar arasyndaǵy fınaldyq shaıqastar oınalyp bitti. Onda 11 jerlesimiz fınalǵa shyǵý úshin kúsh synasty. Bulardyń 5-i sol maqsattaryna jetse, 6 qyzymyz asýdan asa almady. Biraq bul altylyq chempıonattyń qola júldegeri atandy.
Al fınalǵa shyqqandar qataryndaǵy Nazerke Jurǵabaeva (46 kg) - ıtalıan Roberta Bonattıdi (3:0), Asyl Asqarova (48 kg) - úndi Asha Rokany (2:0), Balaýsa Muzdyman (54 kg) – reseılik Oksana Smıronovany (3:0), Lıýbov Hasıeva (66 kg) – polıak Larısa Sabınııarzdy (2:1), al Aqmaral Shaımshıdenova (80 kg) ýkraın Vıktorııa Mıhaılovany (3:0) tize búktirdi.
Qola medaldy qanaǵat tutyp qalǵandar arasyndaǵy Aıgerim Oshaqbaı (52 kg) – fransýz Santıana Maýranǵa (0:3), Nazym Ishanova (57 kg) – AQSh ókili Djajaıra Gonsaleske (0:3), Ekaterına Anısımova (60 kg) – ırland Kıara MakKıntıge (0:3), Aıda Ábikeeva (63 kg) – polıak Iýstına Valashqa (0:3), Baıan Aqbaeva (70 kg) fransýz Davına Mıshelge (0:3) jol berip aldy. Al Altyn Muqyshbekova (75 kg) taıpeılik Chen Nıen-Chımen aıqastyń 1-raýndynda nokaýtqa túsip qaldy.
Búgin jasóspirimder arasyndaǵy chempıonattyń fınaldyq jekpe-jekteri ótedi. Onda bizdiń Nazerke Jurǵabaeva – AQSh-tyq Kaıtın Oroskomen, Asyl Asqarova – reseılik Ekaterına Palsevamen, Balaýsa Muzdyman – ýkraın Anjelına Bondarenkomen, Lıýbov Hasıeva –orys Svetlana Hodarevskaıamen, al Aqmaral Shamshıdenova reseılik Vlada Kalachevamen altyn medal úshin shaıqasady.
Damır Qojamqul.
