22 mamyrda áıel adam Pavlodar oblysynyń kardıologııalyq ortalyǵyna josparly konsýltasııa alýǵa júgingen. Qaralý kezinde pasıent álsizdikke, entigýge, jótelge, keýdeniń aýyrsynýyna, jilinshigi men tabanynyń isinýine shaǵymdanǵan.
Qoıylǵan dıagnoz: ekijaqty plevropnevmonııa, dem jetispeýshiliginen jaǵdaıy shamamen ortasha aýyr, júrek qyzmetiniń dekompensasııasy.
Anamnezden belgili bolǵandaı, 13 mamyrdan 21 mamyrǵa deıin áıel adam Ekibastuz qalasynyń jeke medısınalyq ortalyǵynda stasıonarlyq em alǵan, ol jerde 2-tıptegi qant dıabeti anyqtalǵan.
22 mamyrda PTR zertteý nátıjesi bul kisiniń COVID-19 vırýsyn juqtyrǵanyn kórsetti. Emdelýshi oblystyq aýrýhananyń juqpaly aýrýlar gospıtaline jatqyzyldy.
Qazir naýqaspen baılanysta bolýy múmkin adamdar toby anyqtalyp, epıdemııaǵa qarsy sharalar júrgizilip jatyr.
Búgingi kúnge Pavlodar oblysynda koronavırýs ınfeksııasymen aýyrǵan 177 adam tirkelgen.
