«Bıyl qasıetti Ramazan aıy karantın jaǵdaıynda ótkenin jaqsy bilesizder. Bul jaǵdaı saýapty amaldar men ıgi sharalarǵa kedergi keltirmedi. Meshit tarapynan kómekke muqtaj otbasylarǵa qaıyrymdylyq jasaldy. Aýyzashar asy tegin taratyldy. Maqtaaral aýdanyndaǵy jerlesterimizge gýmanıtarlyq jáne qarjylaı kómek kórsettik. Saýaptar eselenip jazylatyn berekeli aıda ıgi iske atsalysqan barsha azamatqa aıryqsha alǵysymdy bildiremin», dedi Bas múftı.
Sondaı-aq ol Qazaqstan musylmandary dinı basqarmasynyń tótenshe jaǵdaı kezinde qabyldaǵan sheshimine túsinistik tanytqan qazaqstandyqtarǵa alǵys aıtty.
«Qazaqstan musylmandary dinı basqarmasynyń tótenshe jaǵdaı kezinde qabyldaǵan sheshimine túsinistik tanytyp, orazany oqshaý túrde ótkizip, úıde qulshylyq jasaǵan jamaǵatqa óz atymnan taǵy da alǵysymdy jetkizemin. Alla qabyl etsin!
Oraza aıt merekesi qutty bolsyn! Rabbymyz duǵa-tilegimizdi, qasıetti aıda jasaǵan qaıyrly amalymyzdy, bergen zeket pen pitir sadaqamyzdy qabyl etkeı! Ár otbasyna amandyq, jaqsylyq tileımin. Orazadan orazaǵa deıin aman-esen jete bereıik! Jer betinen juqpaly dert joıylyp, merekeli, berekeli sátterde júzdesýdi jazǵaı! Elimiz aman, jurtymyz tynysh bolǵaı!» dedi ol.
