Al, Aıgúl Rzaeva bolsa, tapsyryspen as daıyndaý isin jolǵa qoıǵan. Jalpy, jyl basynan beri aýdanda 22 azamat óz isin dóńgeletýde. «Jumyspen qamtýdyń jol kartasy», «Eńbek» baǵdarlamalary aıasynda talpynyp tirshilik jasaıtyndar sany birtindep kóbeıip keledi..
–Súıikti isin tabys kózine aınaldyryp, kásipker ataný ońaı emes. Ol úshin kásipkerlik negizderin meńgerý qajet,–deıdi kásipker Damıra Bıtenova. Medbıke retinde 20 jylǵa jýyq eńbek ótili bar ol jeke kosmetologııalyq kabınetin ashyp, kásipker ataný úshin aldymen «Bastaý bıznes» jobasy aıasynda bilim alǵan. Sol biliminiń arqasynda bıznes josparyn jasap, grant ıegeri atanady.
Grant qarjysyna kosmetologııalyq kombaın men sterılızator satyp aldy. Sóıtip, shaǵyn kabınettiń qyzmet kórsetý aıasy keńeıe túsedi.
–2019 jyly 51 mıllıon teńgege 132 zerendilik azamatqa grant berildi, al jalpy «Bastaý bıznes» baǵdarlamasy boıynsha 250 adam oqýdan ótti. Nátıjesinde jeke kásipterin damytýǵa 88 adamǵa jalpy somasy 350 mıllıon teńge kóleminde shaǵyn nesıe berildi. Bizdiń basty maqsatymyz jeke kásipkerlikke bet buryp, qarjy alǵan azamattarǵa qoldaý kórsetý. Bir jyl boıy biz olarǵa bıznes-jospar boıynsha jumys isteýge kómektesemiz, býhgalterlik esep, salyqtyq esep berýdi úıretemiz,–deıdi aýdandyq kásipkerlerdi qoldaý ortalyǵynyń keńesshi menedjeri Raýshan Omarova.
Jeke kásibin ashýǵa zerendilikterdiń qulshynysy joǵary. Bıyl «Bastaý bıznes» aıasynda oqýdan ótýge 300-den astam ótinish kelip túsken. Koronavırýs indetine baılanysty kásipkerlik negizderi boıynsha oqytý onlaın-rejımde ótedi dep josparlanyp otyr.
