«Keshe Almaty qalasynyń halyqqa qyzmet kórsetý ortalyqtary jumysyn qaıta jandandyryp, jańa formatta qyzmet kórsete bastady. «Azamattarǵa arnalǵan úkimet» memlekettik korporasııasy koronavırýs pandemııasy qaýipiniń saqtalýyna baılanysty memlekettik qyzmetterdi kórsetýdiń jańa formatyn usynǵan bolatyn. Soǵan sáıkes azamattar HQO-dan tek «qaǵaz júzindegi» qyzmetter men onlaın túrde rásimdelgen qyzmetterdiń nátıjelerin ala alady.
Alǵashqy jumys kúni qarbalasqa toly boldy. Eki aıdan beri memlekettik qyzmet alýǵa qatysty máseleleri jınaqtalyp qalǵan almatylyqtardyń keıbiri, HQO-nyń jańa formattaǵy jumysyn eskermeı, kezekti brondamastan kelip alǵan. Olarǵa arnaıy mamandar bólinip, HQO aýlasynda smartfon arqyly bron jasaldy. Kópshiligi qujattarynyń merzimi ótip ketti dep asyǵyp kelgen. Azamattarǵa aıtarymyz, merzimi ótken qujattar 10 shildege deıin jaramdy. Elektrondyq qyzmetterdi úıinde alý múmkindigi joq adamdarǵa, Almaty qalasynda 40-tan asa ózine ózi qyzmet kórsetý sektorlary uıymdastyrylǵan. Al, sıfrlyq qyzmet alýdy meńgermegender úshin Almaly jáne Alataý aýdandarynda 2 sıfrlyq HQO jumys isteýde. Munda mamandar onlaın qyzmet alýdy úıretedi. Jalpy, memlekettik qyzmetterdi usynýdyń qazirgi jańa ádisi, eń aldymen qyzmet alýshy úshin óte yńǵaıly», - delingen jazbada.
Alǵashqy jumys kúni Almaty HQO-larynda 12,5 myńnan asa memlekettik qyzmet kórsetildi. Olardyń 70%-dan astamy aldyn ala brondaý arqyly qamtamasyz etilgen. Qalǵandary sol jerde bron jasaǵan nemese operatorlardyń bosaýyn kútken.
Osylaısha, Almaty qalasyndaǵy 16 front-ofıs (onyń ekeýi sıfrlyq HQO), 5 mamandandyrylǵan HQO, 2 Mıgrasııalyq qyzmet kórsetý ortalyǵynyń alǵashqy jumys kúninde 12542 adam qyzmet alýǵa júgingen.
Front-ofısterge júgingen 7208 adamnyń 2558-i tólqujaty men jeke kýálikterin rásimdegen, 619 adam turǵylyqty jeri boıynsha tirkelgen. Onyń 475-i turaqty, 144--i ýaqytsha tirkelip, 48 adam turǵylyqty jerinen esepten shyqqan.
Mamandandyrylǵan HQO-larǵa júgingen 3589 qyzmet alýshynyń 3012-si kólik quraldaryn tirkeý jáne qaıta tirkeý, 577-si júrgizýshi kýáligin rásimdeý qyzmetteriniń nátıjelerin aldy.
Mıgrasııalyq HQO-larda sheteldik azamattarǵa 696 qyzmet kórsetilgen. Olardyń 496-sy eńbekke ruqsat alý, 149-y ýaqytsha tikeýge turý, 51-i JSN alý qyzmetterine júgingen.
Almaly jáne Alataý aýdandarynda ashylǵan sıfrlyq qyzmet kórsetý ortalyǵyna 1050 adam kelip, elektrondyq qyzmetter alyp, onlaın qyzmet alý daǵdylaryna úırengen.
Halyqqa qyzmet kórsetý ortalyǵyna kezek ýaqytyn egov.kz portaly, telegram-bot eGovKzBot2.0 nemese 1414 nómirine qońyraý shalý arqyly belgileý qajet. Eskeretin jáıt, HQO-ǵa qatań túrde belgilengen ýaqyt aralyǵynda barǵan jón. Sebebi bron ýaqyty ótip ketse, qaıta brondaý rásimin jasaý kerek bolady. Sonymen qatar bron barysynda tirkelgen JSN ıesi ǵana elektrondy kezekti paıdalana alady.
Almaty HQO-larynyń jumys ýaqyty dúısenbi men senbi aralyǵynda, tańǵy saǵat 9.00-den keshki saǵat 20.00-ge deıin, degen aqparattardy da Jańyl Ápetova óz paraqshasynda habarlaǵan.
