Sońǵy derekter boıynsha, elimizdiń keıbir óńirlerinde COVID-19 juqtyrǵandar sany kúrt artyp, 9 myńǵa jýyqtady. Ásirese Almaty men Nur-Sultan qalalarynda, Atyraý oblysynda atalǵan indet órshı tústi. Memleket tarapynan indettiń indete taralmaýy úshin barlyq sharalardyń der kezinde qolǵa alynýy birshama ýaqyt boıy bul aýrýdyń betin qaıtarýǵa septesti. Degenmen, halyqtyń nápaqasyz qalmaýy da eskerilip, keıbir mekemeler men uıymdardyń qyzmetin qaıta bastaýyna múmkindik berildi. Biraq munyń barlyǵy karantındik talaptardyń aıasynda ekeni eskerýsiz qalǵandaı. Sońǵy kúnderi elordanyń ózinde sanıtarlyq normalardy saqtamaǵany úshin 26 nysan jabylyp, keıbiri kemshilikterin túzegen soń jumystaryn qaıta jalǵastyrǵan.
Sondaı-aq Qaraǵandy óńiriniń barlyq kásiporyny kúsheıtilgen sanıtarlyq rejimge kóshirilse, Túrkistan oblysy karantındi 8 maýsymǵa deıin sozdy. Al Aqmola oblysynyń Selınograd aýdanyna qarasty Talapker aýylynda bir jasar balanyń atalǵan dertti juqtyryp alýy koronavırýsqa qatysty enjarlyq tanytýǵa bolmaıtynyn kórsetip otyr.
Desek te azamattarymyz saqtyq sharalaryn umytqan syńaıly. Kóshede qozǵalys kóbeıse de, kópshilik betperdesiz júrgenin ańdaý qıyn emes. Osyǵan oraı Memleket basshysy Qasym-Jomart Toqaev «Qalalarda karantın sharalary saqtalmaǵandyqtan indet juqtyrǵandar sany artyp barady. Úkimet, oblys jáne qala ákimderi jaǵdaıdy retteýi kerek. Kópshilik oryndarda, qoǵamdyq kólikterde betperde taǵý mindetti. Azamattardyń densaýlyǵyn saqtaý úshin naqty sheshimder qabyldaý qajet» dep jazǵan bolatyn týıtterdegi paraqshasyna.
Eki dúnıe arasyn bir qadam qylǵan qaterli indetti san saqqa júgirtip, beıqamdyq tanytýǵa bolmaıdy. Biraq aýyrǵan kisige bal da ashy bolatynyn aýyrmaǵan adam qaıdan bilsin?! Basqa túskende ǵana baspaqshyl bolatyn ádetimiz baryn da joqqa shyǵarmaımyz. Synyqtan ózgeniń bári juǵatynyn áste umytpaý qajet. Áıtpese asqynǵan aýrý nasyrǵa shabatynyn aq jeleńdi abzal jandar aıtýyndaı-aq aıtyp keledi. Degenmen jaz keldi, jazben birge taza aýaǵa tynystaýǵa shyqqan turǵyndarda esep joq. Erkindik pen erensizdik egeske túskende, erensizdik jeńip shyqqandaı áser qaldyrady. Al munyń sońy karantınniń qaıta kúsheıtilýine, oqshaýlaný jaǵdaıynyń sozylýyna alyp kelýi de yqtımal.
Kúndelikti naýqastardy qabyldap jatqan ınfeksıonıst-dáriger Gúlmıra Qalmaǵanbetovanyń aıtýynsha, halyq áli de ara qashyqtyqty saqtaýy mindetti.
– Qazir qalada da, dalada da adamdar karantınniń áýelgi talaptaryn saqtamaı, bosańsı bastaǵanyn baıqap júrmiz. Sonyń saldary bolar, elimizde vırýs juqtyrýshylar qatary azaıar emes. Sondyqtan meılinshe úıde bolyp, úı jaǵdaıynda oqshaýlanǵan durys der edim. Sonymen birge betperde rejimin de buzýǵa bolmaıdy. Baıqasańyz, qazir kóptegen azamattar betperdeni qaltasyna salyp júredi, ne ıegine taǵyp alady. Bul – durys emes. Betperde eń birinshi ózińizdi, otbasyńyzdy, et jaqyndaryńyzdy qorǵaý úshin kerek. Odan keıin ózińiz ómir súretin ortanyń qaýipsizdigi úshin de ózekti ekenin eskergen jón. Sol sebepti jeke gıgıenalyq tazalyqty saqtap, únemi qoldy jýyp, antıseptık quraldaryn qoldanýǵa keńes beremiz, – deıdi Gúlmıra Saparǵalıqyzy.
Al qala aýlasynda shýlaǵan bala-shaǵa men olardy jaqynnan baǵyp otyrǵan ata-analarǵa zer salsańyz, bir beıǵamdyqty baıqar edińiz. Álbette bári birdeı emes. Betperdesin sheshpeı, qolyna medısınalyq qolǵap kıgen jandardyń biri Aıdana Eldosqyzy qala kóshelerindegi kópshiliktiń betperdesiz júrýine qarsylyǵyn jasyrmady.
«Zań, talap – barshaǵa ortaq. Birimiz boıusynyp, birimiz qulaqqa ilmeıtin bolsaq, onyń nesi karantın?! Bul memlekettiń de karantındi saǵyzdaı sozýyna alyp keledi. О́ıtkeni jalpy halyqtyń amandyǵyna memleket jaýap beredi. Adamdar da ózderiniń jaýapkershiligin sezinýi, soǵan daǵdylanýy qajet dep oılaımyn» deıdi ol.
Rasynda, «synyq arba kóp kósher» degendeı, deni dimkás qoǵamda bul derttiń buıdasyna ıe bola almaý qaýpi basym. Sondyqtan kúnniń shyjǵyrǵan ystyǵyna qaramastan, betperde kıip, ózińizdiń de, ózgeniń de jaıyn oılaǵan lázim. Mamandardyń da, azamattardyń da ortaq tilegi osy arada toqaılasady.
