«Sımptommen kelgen naýqastardyń sany 15-16% kóleminde. Jalpy naýqastardyń 70%-y sımptomsyz tirkelgender. Bul naýqastardy tabý úshin biz Densaýlyq saqtaý mınıstrligi jáne jergilikti ákimshiliktermen birlesip, aldyn alý profılaktıkalyq skrınıngtik jumystar júrgizip jatyrmyz. Prezıdent tapsyrmasy boıynsha qazirgi kúnde skrınıngtiń kólemi kúnine 3-4 myń bolsa, qazir 25 myń testke kóbeıttik», - dedi Eljan Birtanov.
Mınıstr úlken ujym qyzmetkerlerin skrınıngten ótkizýdiń mańyzy týraly aıtty.
«Jalpy osy epıdemııa bastalǵannan beri elimizde 711 myń test jasaldy. Olardyń 260 myńnan astamy, 40%-y profılaktıkalyq skrınıng dep aıtýǵa bolady. Osyndaı úlken ujymdarǵa shyǵyp, medısınalyq uıymdarǵa, arnaıy áleýmettik uıymdarda skrınıng ótkizip, biraz naýqastardy taýyp, ızolıasııaǵa jiberip jatyrmyz. Bul – óte mańyzdy másele», - dedi mınıstr Birtanov.
Kóp jaǵdaıda azamattar «men aýyrmaımyn, eshqandaı sıpmtomdar joq, nege meni aýrýhanaǵa jatqyzady» dep suraıtynyn aıtty.
«Sımptomsyz naýqastar basqalarǵa ınfeksııany juqtyrýy múmkin. Bul – belgili jaǵdaı. Sonymen, búkil dúnıejúzindegi ǵylymı zertteýlerdiń negizinde osyndaı sımptomsyz naýqastardy ızolıasııaǵa jiberýimiz kerek. Olardy aýrýhanaǵa jatqyzamyz. Qazir múmkindik bolsa úılerinde nemese arnaıy karantındik stasıonarǵa jatqyzyp, basqa halyqtan oqshaýlaýymyz kerek. Keıbir memleketterde bul naýqastardy sanamaıdy, jalpy statıstıkaǵa kirmeıdi. Biraq biz buny durys emes dep oılaımyz. Biz Qazaqstandaǵy tártip boıynsha barlyq naýqasty esepke kirgizemiz», - dedi Eljan Birtanov.
