Sondyqtan búgingi kún tártibindegi basty másele – adamı kapıtaldy damytý. Al adamı kapıtaldy kóterý azamattardyń bilim men densaýlyq sapasyn arttyrýmen tikeleı baılanysty. Soǵan oraı Ulttyq qoǵamdyq senim keńesiniń keshegi otyrysynda birqatar sheshim qabyldandy. Eń bastysy, ǵylymǵa bólinetin qarjynyń kólemi ósetini belgili boldy.
Memleket basshysy Qasym-Jomart Toqaev jańa ahýal bilim berý jáne ǵylym júıesin túbegeıli reformalaýdy talap etetinin aıtty. Iаǵnı, 2025 jylǵa deıin bilim salasyna bólinetin qarajat 6 ese, ǵylym salasyna 7 ese ósetinin habarlady. Bul eldegi ǵylymnyń damýyna úlken serpin bolmaq. Sonymen birge aýyl men qala mektepteriniń ahýaly teńestirilip, tehnıkalyq múmkindigin júıeleý qarastyrylady. Eldi mekenderde shyǵarmashylyq ortalyqtar sanyn kóbeıtý tapsyryldy. Úsh aýysymda bilim berý toqtatylyp, aldaǵy 4 jylda 650 000 oryndyq 800 mektep, 700 sport kesheni salynatyny aıtyldy. Bul keler urpaqtyń jaqsy bilim alýyna múmkindik ashpaq. Taǵy bir aıtyp ótetini, aýyl men qaladaǵy ınternet baılanysynyń teńestirilýi de qýanarlyq jańalyq. Qazir sıfrly teńsizdik degen uǵym bar. Endi ol joıylyp, aýyl balalary da ınternetke qol jetkizedi degen senimdemiz.
Al endi búginniń batyrlary – medısına qyzmetkerlerine de basa nazar aýdaryldy. Dárigerdiń jalaqysy ortasha jalaqydan 2,5 ese joǵary bolatyny málim boldy. «Bul kórsetkishke 2023 jylǵa qaraı qol jetkizý qajet. Osy kúrdeli kezeńde barshamyz medısına mamandarynyń qajyrly eńbegine kýá boldyq», – dedi Prezıdent.
Pandemııa kezinde barlyǵymyz, muǵalim men dárigerdiń bizdiń qoǵamdaǵy orny erekshe ekenin, qarapaıym jumysshylardyń eńbegi eren ekenin túsingendeı boldyq. Sondyqtan qarapaıym eńbek adamynyń áleýmettik deńgeıiniń joǵarylaýyn mańyzǵa alýymyz kerek. Sol kezde elimizde áleýmettik teńdik te, damý da bolmaq.
Erlan SAIYROV,
Ulttyq qoǵamdyq senim keńesiniń múshesi
