«1997 jyly saıası qýǵyn-súrgin qurbandaryn eske alý kúni etip belgilendi. Asharshylyq sonyń tasasynda qaldy. Is júzinde bulardy bir-birimen salystyrýǵa kelmeıtin uǵym. Saıası qýǵyn-súrginniń qasiret ekeni ras. Bizdiń elde 120 myńdaı adam sottaldy, onyń 25 myńy atylyp ketti deımiz. Al asharshylyqtan 1917 jyldan 1933 jylǵa deıin 16 jyldyń ishinde bizdiń esebimiz boıynsha 4,5 mıllıon adam qurban boldy. Sol qurban bolǵandardyń yqtımal tabıǵı ósimin eseptesek, 10 mıllıondaı adamnan aıyryldyq. «Ádilet» uıymy birneshe ret konferensııa ótkizdik. Ǵalymdardyń bári qatysty. Birneshe usynys jasadyq. 31 mamyrdyń qarsańyndaǵy jumada ǵıbadat oryndarynda, mektepterde, mekemelerde asharshylyq qurbandaryn arnaıy eske alý kúnin ótkizeıik degen másele kóterildi. Basynda bizdi qoldap, sol kezdegi Bas mýftı Ábdisattar Derbisáli juma namazynda ýaǵyz aıtyp, jaqsy túsindirgen edi. Keıin birtindep qala berdi. Sodan sońǵy eki-úsh jylda ǵana saıası qýǵyn-súrgin jáne asharshylyq qurbandaryn eske alý dep qosa bastady. Onyń ózinde durys atalyp jatqan joq»,- dedi jazýshy.
Beıbit Qoıshybaev asharshylyq qurbandaryn arnaıy eske alý kúnin ótkizýmen qatar, osy taqyrypty zertteıtin ınstıtýt quryp, onyń janynan mýzeı ashýdy usyndy.
«Evreılerdiń dúnıe júzi biletin holokostty zertteıtin ınstıtýty jáne arnaıy eske alý mýzeıi bar. Sonda qurbandardyń sýretimen tolymdy maǵlumat berip, áserli mýzeı jasaǵan. Bizge de sondaı ınstıtýt quryp, onyń janynan mýzeı ashý kerek. Bizdiń halyq – shejireshil halyq. Qurbandardyń aty-jónin qalpyna keltirýge bolady. Ǵylymı eńbekterdi, ári shejireshilerdiń málimetin paıdalanyp, áseri ǵalamat mýzeı ashýǵa múmkindik bar. Bul osynaý qasiretin túsiný úshin jáne is júzinde halyqty birlikke uıytý úshin mańyzdy bolar edi»,- dep atap ótti B.Qoıshybaev.
