– Bul port burynǵy Gýrev qalasynda 1926 jyly ashylǵan edi. Sodan beri bir ǵasyrǵa jýyq merzimde kemelermen júk tasymaldanyp keldi. Al, 2010 jyly portqa rekonstrýksııa júrgizilip, jyl saıynǵy júk qabyldaý qýatyn 15 myń tonnaǵa jetkizgen edik. Alaıda, bes jyl buryn jumysymyzdy toqtatýǵa májbúr boldyq. О́ıtkeni, Jaıyq-Kaspıı kanalymen júk tasymaldaý múmkin bolmady. Kanal joly bitelip, tereńdetý jumystaryn júrgizý qajettigi týyndady, -deıdi Atyraý ózen portynyń dırektory Azamat Zulharnaev.
Onyń aıtýynsha, portqa sý jolymen sońǵy ret 2015 jyly júk kelipti. Sol kezde sheteldik munaı jáne servıstik kompanııalardyń tapsyrysymen jetkizilgen júk qabyldanǵan edi. Sodan keıin Atyraýǵa sý jolymen keletin júkter Mańǵystaýdaǵy Baýtın portyna jetkiziletin boldy.
Endi mine, Atyraý ózen portyna bes jyldan keıin iri gabarıtti júkti qabyldaı bastady. Bul –gaz-hımııa kesheni úshin Ońtústik Koreıada qurastyrylǵan propan saqtaıtyn rezervýarlar.
–Biz gaz-hımııa kesheniniń qurylysyna qajetti rezervýarlardy qabyldap aldyq. Onyń salmaǵy –532 tonna. Iri gabarıtti júkti eki barjamen jetkizdi. Jaqynda taǵy osyndaı úsh barjamen keletin aýyr júkti kútip otyrmyz, -deıdi ózen portynyń qyzmetkeri Rýslan Asanov.
О́zen portynyń dırektory Azamat Zulharnaevtyń aıtýynsha, endi munda alys jáne jaqyn shetelderden taýardyń kez kelgen túri tıelgen sý kólikterin qabyldaýǵa tolyq múmkindik bar.
