Karantın kezinde qashyqtan oqytý jumystaryn oıdaǵydaı uıymdastyryp otyrǵan bilim oshaǵynyń biri Qaraǵandy oblysy, Jańaarqa aýdanyndaǵy Aqtaý aýylynda ornalasqan, Aqtaý jalpy orta bilim beretin mektebi. Shalǵaıy shalǵaı-aq. Oblys ortalyǵynan shyǵyp, osy Aqtaýǵa jetemin degenińizshe 300 shaqyrymnan astam jol júrer edińiz. Onysymen qoımaı, álem jurtshylyǵy 5G ınternetti ıgerip úlgergen HHI ǵasyrda bul aýyldyń turǵyndary qarapaıym uıaly telefon baılanysyna zárý. Hosh. Aıtpaǵymyz bul emes edi.
– Aýyldaǵy birde-bir úıge ınternet jelisi tartylmaǵan. Alaıda ınternet múldem joq deýden aýlaqpyn. Spýtnık arqyly aýyl ákimdigi, mektep jáne dárigerlik ambýlatorııa syndy nysandar ǵana qamtylyp otyr. Sol sebepti de qashyqtan oqytý jumystaryn uıymdastyrý kezinde birqatar qıyndyqtar týyndady. Bilim jáne ǵylym mınıstrligi biz sekildi shalǵaıda jatqan aýyl turǵyndaryna «Balapan», «EL ARNA» telearnalary men Qazaq radıolary arqyly balamaly oqytý júıelerin usynǵany belgili. Qazirgi tańda biz «Balapan» arnasynyń múmkindigin keńinen qoldanyp otyrmyz, – deıdi mektep dırektory Maqsat Arýnov.
Onyń aıtýynsha, mektep ákimshiligi munymen shektelgen joq. Keńese kele, aýyl turǵyndaryna ınternetsiz korporatıvtik Wi-Fi jelisin tartý týraly sheshim qabyldady. Bul Wi-Fi jelisiniń artyqshylyǵy sol, buǵan ınternetke tólegendeı eshqandaı trafıktik tólem alynbaıdy. Iаǵnı ata-analar úshin tegin. Osylaısha jelilik júıe oılastyrylyp, iske qosyldy. Oqýshysy bar shańyraqtarǵa 54 mektep kompıýteri ýaqytsha berildi. Sonyń ishinde kompıýteri joq 27 kópbalaly otbasy da bar. 1 kompıýter ǵana mektep ǵımaratynda qaldyrylyp, qalǵan 54-i joǵaryda atap ótken jeli arqyly bir-birimen baılanys jasap tur.
Korporatıvtik Wi-Fi jelisi degenimiz ne? Bul jeli baıaǵydan bar. Alaıda osy ýaqytqa deıin bul lokaldi jeli úlken ǵımarattarda ǵana qoldanylǵan edi. Al mektep ákimshiligi jańalyq retinde ony aýmaǵy 1,5 shaqyrymdy quraıtyn aýylǵa, onda ornalasqan úılerge tartyp otyr. Osylaısha oqýshylardyń onlaın túrde oqýdan qol úzip qalmaýyna kúsh salyndy. Olar úıden shyqpaı-aq jeli arqyly sabaq tapsyrmalaryn alyp, bilimin jetildirýde.
Gúlshahar KО́BEEVA,
Jańaarqa aýdandyq bilim bóliminiń ádiskeri
Qaraǵandy oblysy
