«Qazaqstan Respýblıkasynyń keıbir zańnamalyq aktilerine erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» Zań jobasyn Parlament depýtattary ázirledi. Bul zań jobasyn Májilis depýtaty Berik Ospanov tanystyrdy.
– Qazirgi ýaqytta qoryqtar, tabıǵı rezervattar, ulttyq parkter, botanıkalyq baqtar, óńirlik parkter, tabıǵat eskertkishteri, qaýmaldar men qoryq aımaqtary jatatyn erekshe qorǵalatyn tabıǵı aýmaqtardyń jalpy alańy 26,2 mln gektardy nemese el aýmaǵynyń 9,6 paıyzyn quraıdy. Bizdiń ortaq – mindetimiz olardy saqtap qalý jáne kóbeıtý. Qaralyp otyrǵan zań jobasy dál osyǵan baǵyttalǵan. Onyń negizgi ıdeıasy – týrızm obektilerin jáne erekshe strategııalyq mańyzy bar qurylystardy salý, olardyń jumys isteýi úshin buryn shyǵarylǵan, maqsatty paıdalanylmaıtyn jerlerdi erekshe qorǵalatyn tabıǵı aýmaqtar quramyna qaıtarý. Is júzinde mundaı jaǵdaılar bar. Máselen, bul – Býrabaı memlekettik ulttyq tabıǵı parki jáne Ile-Alataý memlekettik-ulttyq tabıǵı parkiniń jerleri. Erekshe qorǵalatyn tabıǵı aýmaqtardyń quramyna kirmegendikten bul jerler tıisti túrde qorǵalmaıdy. Osy aımaqtarda mekendeıtin janýarlar men ósetin ósimdikterge zalal keltirilýi múmkin, – dedi Berik Ospanov.
Budan basqa depýtattar ekologııalyq týrızmdi damytý aıasynda tabıǵat qorǵaý mekemeleriniń kórsetetin qyzmetiniń tizbesin keńeıtýdi usyndy.
