Azamattar mamyr aıynda HQO-lar ashylǵannan keıin kóbine jeke kýálik pen pasport alý úshin júgingen. Aldyn ala esepteýler boıynsha 155 myńnan astam azamat jeke basyn kýálandyratyn qujatyn jańartqan. Onyń ishinde 9298 adam Almaty HQO-larynan alǵan.
Ekinshi orynda avtokólikti qaıta tirkeý qyzmeti. Mamyrda avtomobıl ıeleri Qazaqstannyń mamandandyrylǵan HQO-larynda 118 myńnan astam kólikti qaıta tirkegen, onyń 13 363-i Almaty qalasynyń úlesinde.
HQO-lardyń ashylýyn jyljymaıtyn múlik ıeleri de kútti. Azamattar jyljymaıtyn múlikke quqyqtardy (aýyrtpalyqtardy) memlekettik tirkeý qyzmeti úshin HQO-ǵa 56 myńnan astam ret júgingen, onyń 2402-i Almaty qalasynda.
Tórtinshi orynda júrgizýshi kýálikterin aýystyrý jáne berý qyzmeti. Mamyr aıynda 30 myńǵa jýyq qujat rásimdelgen, onyń 3310-i Almatynyń úlesinde.
Karantınnen keıingi suranysqa ıe besinshi qyzmet – áleýmettik qaýip-qater jaǵdaıynda áleýmettik járdemaqylar taǵaıyndaý qyzmeti. Bul negizinen júktilik jáne bosanýǵa baılanysty beriletin tólemder. Ony 20 myńnan astam júkti áıel alǵan, onyń ishinde Almaty qalasynda 1391 ana tólemin rásimdep aldy.
Azamattarǵa arnalǵan úkimettiń aldyn ala málimetteri boıynsha mamyr aıynda HQO arqyly 645 myńnan astam memlekettik qyzmet alynǵan. Bul jerde HQO-lardyń ár ýaqytta ashylǵanyn eskerý kerek. Máselen, Qaraǵandy oblysynyń halyqqa qyzmet kórsetý ortalyqtary 4 mamyrda, al Almatydaǵy HQO-lar óz jumysyn 25 mamyrda bastady. Sodan beri Almaty qalasynda 23 686 qyzmet kórsetildi.
Esterińizge sala keteıik, tótenshe jaǵdaı rejımi alynyp tastalǵannan keıin HQO ǵımarattarynda azamattardyń jınalýyn jáne qyzmet alýshylardyń vırýsty juqtyrý jaıdaılaryn boldyrmaý úshin HQO-lar egov.kz portalynda qoljetimsiz jáne tek aldyn ala brondaý arqyly «qaǵaz» júzinde kórsetiletin qyzmetterdi (106 memlekettik qyzmet) ǵana usynady. HQO-ǵa kezekti egov.kz portaly, eGovKzBot2.0 telegram-boty nemese 1414 baılanys ortalyǵyna qońyraý shalý arqyly brondaýǵa bolady.
