Qalanyń bas polıseıi karantın rejımi kezinde shahardaǵy qylmystyń 51 paıyzǵa azaıǵanyn aıtady. Alaıda kólikke mas kúıinde otyryp, róldi tizgindeıtinder kemimegen. Kesirinen jol ústinde ajal qushatyndar kórsetkishi ózgerissiz qalyp otyr.
Departamenttiń jyl basynan bergi atqarǵan jumysyn saralaǵan basshynyń sózine súıensek, qańtardan beri shymkenttik tártip saqshylary 112 alǵys hat alǵan. Al, «turǵyndardyń aıtqan raqmeti odan da kóp» deıdi Eraly Jumahanbetov.
Qyzmetkerler jumysynan min tappaǵan Jumahanbetov ashylmaǵan qylmystyń da qalmaǵanyn aıtady. 8 jyl buryn jasalǵan zańsyz áreketti de áshkereledik degen ol qalada buzaqylyq kemigenin aıtady. Máselen, kóshedegi qylmys 12 paıyzǵa, qoǵamdyq qylmys 11 paıyzǵa, jol apaty 8 paıyzǵa azaıypty. Biraq, mas kúıinde rólge otyratyndar jáne jol apatynan kóz jumatyndar kórsetkishi sol kúıinde qalǵan.
Bas polıseı shendilerdiń karantın rejımindegi atqarǵan jumysyn da umytqan joq. Tótenshe jaǵdaı kezinde 1800 qyzmetker kezekshilikte turyp, 350 indet oshaǵyn kúzetken. Osy ýaqytta qaladaǵy qylmys 51 paıyzǵa azaıypty.
Jyldyń jartysyn joǵary sapada aıaqtadyq degen E. Jumahanbetov endi Shymkenttegi beınekameralardy 2500-ge jetkizýdi kózdep otyr. Qazirgi ýaqytta qalada 479 beınebaqylaý kamerasy jumys istep tur. Jýyq arada olardyń qataryna taǵy 200 qosylmaq.
