Kópshilik qosyla shyrqaǵan asqaq áýen yrǵaǵymen terbelgen kók baıraqtyń kerbez kelbeti de záýlim úılerdi odan saıyn bıiktete túsip, ár qostanaılyqtyń kóńil túkpirindegi elshildik rýhyn oıatqandaı áser qaldyrdy.
– Memlekettik rámizder – elimizdiń egemendigi men myzǵymastyǵyn, birtutas birligin beıneleıtin basty nyshandarymyz. Bizdiń úıde 150-den astam otbasy turady. Ishinde qazaq, orys, tatar, ýkraın, belorýs, nemis, polıak ultynyń ókilderi bar. Túrimiz, tilimiz ár túrli bolǵanymen, tilegimiz bir. Qazaqstanymyzdyń jyldan-jylǵa qýaty artyp, elimizdiń bolashaǵy baıandy bolsyn. Tilegimiz, kók baıraqty kókke jelbiretetin, Otanyn shyn súıetin patrıot jastarymyz kóp bolsyn! Elimiz aman, halqymyz tynysh bolsyn! – deıdi Abaı kóshesindegi №62 úıdiń turǵyndary.
El júregine elshildik dánin sebetin merekelik sharany qalalyq Ishki saıasat bóliminiń mamandary uıymdastyrypty.
– Biz qala turǵyndarynan mundaı belsendilikti kútken joq edik. Alǵash turǵyn úılerdiń balkondaryna 70 shaqty Tý ilemiz dep josparlaǵanbyz. Keıin týymyz jetpeı qalyp, taǵy satyp alýǵa týra keldi. Turǵyndar eki-úsh kúnnen beri: «Bizge Tý berińizder, nemese qaı jerden satyp alýǵa bolatynyn aıtyńyzdar» – dep qońyraý shalyp jatqandar kóp. Munyń syrtynda, ataýly merekege oraı úshinshi maýsym kúni keshkilik avtosherý ótti. Bul aksııany qalanyń belsendi jastary uıymdastyrdy. Jastar kólikterine Tý, jalaýshalar ilip, qala kóshelerimen júrip ótti. Basty maqsatymyz, memlekettik Týdy keńinen nasıhattaý jáne qala turǵyndaryn otansúıgishtikke úndeý. Memlekettik týymyzdyń ár qoǵamdyq oryndarda, týrıstik nysandarda, saýda ortalyqtarynda, orta jáne joǵary oqý oryndarynda ilinip turýy, júrekke patrıottyq sezim uıalatady, – dedi Ishki saıasat bóliminiń basshysy Ásem Esjanova.
Qostanaı
