Jalpy otyrystyń kún tártibindegi másele boıynsha aldymen Qarjy mınıstri Erulan Jamaýbaev baıandama jasady. Ol 2019 jyly respýblıkalyq bıýdjettiń atqarylýy qalypty ekonomıkalyq ósý jaǵdaıynda júzege asyrylǵanyn, IJО́-niń ósý qarqyny 4,5%-dy quraǵanyn atap ótti.
"Negizgi salalarda óndiristiń ulǵaıýy, ishki suranystyń keńeıýi jáne qyzmet kórsetý sektorlarynyń damýy, jalpy ishki ónimdegi shaǵyn jáne orta bıznes úlesiniń ulǵaıýy, sondaı-aq ınvestısııalyq jobalardy iske asyrý ekonomıkanyń ósýiniń negizgi faktorlary boldy. 2019 jyly negizgi kapıtalǵa ınvestısııalardyń kólemi 8,5%-ke ósti. Salalar arasynda ınvestısııalardyń eleýli ósýi aýyl sharýashylyǵynda – 41,1%, ónerkásipte – 15%, jyljymaıtyn múlikpen operasııalarda 14,7% baıqaldy. Úkimet jumysynyń basymdyqtary – jumyspen qamtamasyz etý, kópbalaly otbasylar men jastardy qoldaý jónindegi sharalardy keńeıtý jáne kúsheıtý", – dedi mınıstr.
Onyń aıtýynsha, sondaı-aq esepti jyly Prezıdent tapsyrmasyn oryndaý barysynda halyqtyń áleýmettik-osal toptarynyń ekinshi deńgeıli bankterdegi jáne mıkroqarjy uıymdaryndaǵy 716 myń kepilsiz tutyný qaryzdary óteldi. Negizgi boryshty tóleý shartymen ósimaqylar men aıyppuldardy esepten shyǵarý boıynsha salyqtyq raqymshylyqty 56 myńǵa jýyq shaǵyn jáne orta bıznes sýbektisi men 750 myńnan astam jeke tulǵa paıdalandy.
