Rásim barysynda Elbasy kitaphanasynyń dırektory, saıası ǵylymdardyń doktory, professor Ámirhan Rahymjanov mekemeniń ortalyq jáne jergilikti memlekettik organdarmen jan-jaqty baılanys ornatyp, táýelsizdik tarıhyn nasıhattaý men patrıot jastardy tárbıeleýdi qolǵa alǵan uıymdarmen tyǵyz jumys isteıtinin belgiledi.
"Biz otandyq, halyqaralyq jobalardy qarqyndy damytýda óskeleń urpaqqa tárbıe men bilim berýge kóp kóńil bólemiz. Ǵylymı-bilim berý jobalarymyz Tuńǵysh Prezıdenttiń tujyrymdyq ıdeıalary men jahandyq bastamalaryn, "Qazaqstan jolynyń" ereksheligin, "Máńgilik el" ulttyq ıdeıasynyń mánin, Elbasynyń maqalalary men baǵdarlamalaryn zertteıdi. Ashylǵan sátinen bastap Elbasy kitaphanasy seriktestikti damytý maqsatynda bir qatar memorandýmǵa qol qoıyp úlgerdi. Mundaı kelisim kóptegen jobalar men baǵdarlamalardy aqyldasa daıyndaýǵa, birlesip júzege asyrýǵa jaǵdaı jasaıdy. Qazaqstan Respýblıkasy Qorǵanys mınıstrligine qarasty mekemelermen Elbasy kitaphanasy kópten beri túrli is-sharalardy uıymdastyryp keledi. Sondyqtan bul memorandýmnyń biz úshin mańyzy zor", – dedi ol.
Osy tusta burynnan seriktes Elbasy kitaphanasy men Tuńǵysh Prezıdent – Elbasy atyndaǵy Ulttyq qorǵanys ýnıversıtetiniń bir qatar shara uıymdastyrǵanyn aıta ketken jón. Qoǵamdyq mańyzy bar olardyń qataryna "Strategııa–2050" negizinde Qazaqstan Respýblıkasy qaýipsizdigin qamtamasyz etýdiń ózekti máseleleri: tájirıbe jáne jospar" dóńgelek ústeli, "El taǵdyryn aıqyndaǵan Táýelsizdik" forýmy, "Jastar ortasynda dinı ekstremızmniń taralýy: jaǵdaıy jáne damý úderisi" dárisi, kóshpeli ekskýrsııalar, t.b. kiredi. Al 2016-2019 jyl aralyǵynda ótken Elbasy kitaphanasynyń semınar-trenıngterine Ulttyq qorǵanys ýnıversıtetinen 200 adam qatysyp úlgergen.
Qujatqa qol qoıǵan Qazaqstan Respýblıkasynyń qorǵanys mınıstri, general-leıtenant Nurlan Ermekbaev elimizdiń ulttyq qaýipsizdigin qamtamasyz etýge N.Á. Nazarbaevtyń zor eńbek sińirgenin aıtyp ótti.
"Uly dalanyń jeti qyry", "Bolashaqqa baǵdar: rýhanı jańǵyrý" maqalalaryna negiz bolǵan Tuńǵysh Prezıdenttiń bastamalary memlekettiń damý vektoryn anyqtap qana qoımaı, qoǵamdyq sanany da, azamattardyń tarıhı jadyn da jańǵyrtady, Qarýly kúshterdiń tárbıe jumysyn baǵyttaıdy. Otan qorǵaýshylar ar-namys pen erliktiń, patrıottyq pen halyqqa qyzmet etýdiń úlgisi bolyp keledi. Elbasy kitaphanasynyń kórmeleri, semınar-konferensııalary qatysýshylardyń kóshbasshylyq qasıetin arttyryp, is pen elge adal bolýdyń qushtarlyǵyn oıatady", - dedi ol. Sóz sońynda ol Elbasy kitaphanasynyń qyzmetin joǵary baǵalap, ortaq jumystyń súbeli jetistikke toly bolaryna senimdilik tanytty.
