Onlaın formatta ótken is-sharaǵa Mańǵystaý oblystyq sotynyń tóraǵasy Erjan Daýlıev, oblystyq sottyń azamattyq ister jónindegi sot alqasynyń tóraǵasy Nursapa Prımashev jáne sýdıalary, Jańaózen qalasy, Munaıly aýdany ákimdiginiń ókilderi, Bıler keńesiniń músheleri, medıatorlar qatysty.
Daýlardy sottan tys retteý ınstıtýttaryn damytý - Qazaqstan Respýblıkasy Joǵarǵy Sotynyń basym jobalarynyń biri. Osy oraıda, qoǵamdaǵy daý-janjaldardy azaıtý úshin halyqpen jumys isteýdiń biryńǵaı alańyn qurý maqsatynda 2019 jyldyń sáýirinde Aqtaý qalasynda Bıler keńesi qurylyp, óz jumysyn bastady.
Tájirıbe kórsetkendeı, Mańǵystaý oblysy Bıler keńesiniń qyzmeti azamattar arasyndaǵy daýlardy tatýlasý arqyly sheshýge kómektesti. Keńes quramyna taraptardy sotqa jetkizbeı-aq tatýlastyra alatyn bedeli men ómirlik tájirıbesi ushtasqan azamattar, onyń ishinde ardagerler men qoǵam qaıratkerleri tańdalyp, olar bılerdiń tarıhı dástúrlerin qoldana otyryp, daýlasýshy jaqtardy tatýlastyrýǵa úles qosty.
Mańǵystaý oblystyq soty Bıler keńesimen birlesip, oblys ortalyǵy Aqtaý qalasyndaǵy Bıler keńesi róliniń oń tájirıbesin, sondaı-aq Jańaózen qalasy men Munaıly aýdanyndaǵy áleýmettik, azamattyq jáne ekonomıkalyq daýlardyń kóptigin jáne Jańaózen qalasynyń oblys ortalyǵynan shalǵaıda ornalasqanyn eskere otyryp, qos aımaqtan Bıler keńesi fılıaldaryn ashý týraly sheshim qabyldady.
Sot tóraǵasy Erjan Daýlıev óńirde tatýlastyrý ortalyǵy, ýnıversıtette medıasııa ortalyqtary, kásipodaq ortalyǵynda jáne "Atameken" kásipkerler palatasynyń Mańǵystaý óńirlik fılıalynda tatýlastyrý sektorlary jumys isteıtinin, biraq bul - qoǵamdaǵy daýly jaǵdaılardyń deńgeıin tómendetýge jetkiliksiz ekenin atap ótti. Onyń ústine, qazirgi kezde pandemııaǵa baılanysty elimizde jarııalanǵan tótenshe jaǵdaıdyń saldarynan otbasy-quqyqtyq, eńbek jáne kásipkerler arasyndaǵy daýlar sany birshama artqan. Osy oraıda, sot tóraǵasy Munaıly aýdany men Jańaózen qalasyndaǵy Bıler keńesiniń fılaly qoǵamdaǵy daý-damaıdy azaıtýǵa aıtarlyqtaı úles qosatyndyǵyna senim bildirdi.
Is-shara sońynda Erjan Daýlıev atqarylǵan jumys az emes, alaıda, alda kútip turǵan tyń mindetter de jeterlik dep, qatysýshylardy osy baǵytta qoıylǵan maqsattarǵa jetý úshin jumyla jumys isteýge shaqyrdy.
