Onyń aıtýynsha, sońǵy bes jyl ishinde Qazaqstandaǵy aýyl sharýashylyq sýbsıdııasynyń kólemi 1,2 trln teńgeni quraǵan jáne 2014 jylǵy 152 mlrd teńgeden 2019 jyly 324,3 mlrd teńgege deıin ósti.
Bul aýyl sharýashylyǵy salasynyń qaryshtap damýyna múmkindik berdi. Sońǵy 5 jyl ishinde aýyl sharýashylyǵynyń jalpy ónimi 1,7 ese ósip, 5,2 trln teńgeni qurady. Saraptama ósimniń sýbsıdııa alatyn sharýashylyqtardaǵy óndiris kóleminiń 2 esege artýymen baılanysty ekenin kórsetti. Sondaı-aq halyqtyń jeke qosalqy sharýashylyqtaryndaǵy ónim óndirisiniń ósimi nebary 30% qurady.
"Agroónerkásip kesheni - ekonomıkanyń naqty sektory, qazir kóptegen elder koronovırýs indetine baılanysty memlekettik qoldaý sharalaryn kúsheıtip jatyr. Memlekettik qoldaýdyń paıdasy oǵan ıe bolǵan sharýashylyqtarda baıqalady", - dedi A. Saparov.
Sonymen qatar, birinshi vıse-mınıstr aýylsharýashylyq ónimderin deldalsyz satýǵa jaǵdaı jasaý máselesine toqtaldy. Ol aýyl sharýashylyǵy, saýda jáne ıntegrasııa mınıstrlikteri, sonymen qatar "Atameken" UKP tıimdi tásilderdi tabý úshin birlesip jumys istep jatqanyn eske saldy. Qazirgi ýaqytta artyq ústeme baǵasyz ónimdi ótkizý úshin kóterme-taratý ortalyqtarynyń jelisin qurý jobasy qarastyrylýda.
Budan ózge qazir Memleket basshysynyń tapsyrmasy boıynsha Almaty, Jambyl jáne Túrkistan oblystarynda "egistikten sórege deıin" pılottyq jobasy júzege asyrylýda.
"Bul joba shaǵyn jáne orta óndirýshilerdi kooperasııa negizinde qarjylandyrýdy jáne óndirilgen ónimdi bólshek saýda oryndaryna ótkizýdi kepildendirý maqsatyn kózdeıdi. Ol úshin "Eńbek" nátıjeli jumyspen qamtý baǵdarlamasynyń jáne aımaqtyq áleýmettik jáne kásipkerlik korporasııalar arqyly bólshek saýda jelilerin qarjylandyrýdyń resýrstary paıdalanylatyn bolady", - dedi AShM ókili.
Sondaı-aq Aıdarbek Saparovtyń aıtýynsha, aýyl sharýashylyq ónimderin daıyndaý salasyndaǵy deldaldar tizbegin qysqartý úshin daıyndaý uıymdaryn sýbsıdııalaý engizildi. Bul qoldaý sharasyn qazirdiń ózinde usaq sharýashylyqtar men úı sharýashylyqtarynyń ónimderin óńdeý kásiporyndaryna tikeleı jetkizýdi qamtamasyz etetin servıstik-daıyndaý ortalyqtary qoldanyp otyr.
