Tergeý barysynda ustalǵandardyń bir jarym jyl boıy jasalǵan 14 mal urlyǵyna qatysy bary anyqtaldy. Jalpy urylar oblystyń Qazyǵurt, Tólebı jáne Saryaǵash aýdandarynyń jaıylymdarynan jylqy urlap otyrǵan. Osylaısha, polısııaǵa ondaǵan aýyl turǵyndary ózderiniń maldaryn jaıylymnan belgisiz tulǵalar aıdap áketkeni týraly aryz túsirgen. Jábirlenýshilerdiń biri polıseılerge ótken jyldan beri mal urylary onyń 25 jylqysyn jymqyryp ketip, ózine 12 mln teńgeden astam shyǵyn keltirgenin habarlaǵan.
Urylardy ustaý maqsatynda qurylǵan oblystyq PD-niń krımınaldyq polısııa, tergeý jáne jergilikti polısııa qyzmetiniń tájirıbeli qyzmetkerlerinen arnaıy jedel-tergeý toby jaqyn mańdaǵy barlyq aýmaqtardy aralap, úı maldaryn satý jáne soıý oryndaryn, sondaı-aq alys sharýa qojalyqtary men jaıylymdardy tekserdi. Nátıjesinde, Qazyǵurt aýdanynyń eki turǵyny ustaldy, onyń biri buryn sotty bolǵan. Tergeý barysynda jedel ýákilder urlanǵan jylqylardy satyp alýshylardyń izine túsken. Belgili bolǵandaı, urylar jaıylymnan jylqylardy aıdap áketip, qoralarynda jasyryn baqqan, sodan keıin olardyń syrǵalaryn aýystyrǵan jáne bazarǵa nemese etke ótkizip otyrǵan. Tergeý barysynda qylmystyq toptyń 14 mal urlyǵyna qatystylyǵy anyqtaldy, onyń jeti deregi Qazyǵurtta, bes deregi Saryaǵashta jáne eki deregi Tólebı aýdandarynda. Aıǵaqty zat retinde polıseıler 70-ten astam jylqyny tárkilep, zańdy ıelerine qaıtardy.
Polısııa departamenti habarlaǵandaı, mal urlyǵyna qatysty búginde tergeý amaldary júrgizilýde jáne mal urylarynyń basqa da osyǵan uqsas qylmystarǵa qatystylyǵy anyqtalýda. Qylmystyq is Túrkistan oblysy PD-niń óndirisinde jáne departament bastyǵynyń qatań baqylaýyna alynǵan.
