Aımaqtar • 20 Maýsym, 2020

Almatyda karantındik sharalar kúsheıtildi

Búgingi tańda Almatyda koronavırýs ınfeksııasyn juqtyrýdyń 3292 oqıǵasy tirkeldi, al sońǵy eki aptada qalada aýyrý deńgeıiniń eki ese kóbeıgeni baıqalǵan. Soǵan baılanysty ınfeksııanyń odan ary taralýyn boldyrmaý maqsatynda osyǵan deıin júzege asyrylyp jatqan sharalarǵa qosymsha sharalar qabyldandy. Almaty qalasy boıynsha Taýarlar men qyzmetterdiń sapasy men qaýipsizdigin baqylaý departamentiniń basshysy – Almaty qalasynyń bas memlekettik sanıtar dárigeri Jandarbek Bekshın qosymsha sharalardyń qajettiligin túsindirip, qala turǵyndarynyń ózindik tártip saqtaýynyń mańyzdylyǵyn taǵy da eske salyp ótti, - dep habarlaıdy Egemen.kz.

Arman OKTIаBR

"Koronavırýsty juqtyrýdyń negizgi oryndary adamdar kóp jınalatyn oryndar men qoǵamdyq kólikter ekeni jasyryn emes, ol jerlerde adamnan adamǵa tyǵyz qarym-qatynas jolymen juǵady jáne odan is júzinde qashyp qutylý múmkin emes. Mine sol sebepti osy demalys kúnderi qoǵamdyq oryndarǵa barýǵa shekteý qoıý jáne sol jerlerde jappaı dezınfeksııa júrgizý sheshimi qabyldandy. Dezınfeksııanyń koronavrýstyń aldyn alýdyń negizi bolyp tabylatynyn, jáne osy uǵymǵa jeke gıgıenany saqtaý, qoldy jıi jýý, úıde dezınfeksııalyq quraldardyń kómegimen ylǵaldy tazalyq júrgizý jáne bólmelerdi jeldetip otyrý syndy talaptar enedi", - dep túsindirdi Jandarbek Bekshın.

Osylaısha, Jandarbek Bekshın taǵy da azamattardy profılaktıka sharalaryn saqtaýǵa shaqyryp, epıdemıologııalyq jaǵdaıdyń kóbine kóp azamattardyń ózindik tártipti saqtaýyna baılanysty ekenin atap ótti. Ol sonymen birge, osyǵan deıin engizilgen shekteý sharalarynyń saqtalatynyn, jáne osy sharalar kesheniniń adamdardyń jappaı juqtyrý qaýpin tómendetýge múmkindik beretinin atap ótti.

Kósheden kelgennen keıin, aınaladaǵylarmen baılanys jasaǵannan keıin qoldy sabynmen muqııat jýý;

Amandasý kezinde qushaqtasyp, qol alyspaý;

Qoǵamdyq oryndarda bir rettik medısınalyq maskalardy árbir 2-3 saǵat saıyn aýystyryp qoldaný;

Qoǵamdyq oryndarǵa barýdan aýlaq bolý (SOO, sporttyq jáne oıyn-saýyqtyq sharalar, qarbalas kezde qoǵamdyq kólikterge barýdan);

Koronavırýs belgileri bar adamdarmen bir bólmede qalýdan jáne jaqyn baılanys jasaýdan aýlaq bolý;

Qolyńyzben ustaǵan gadjetterdi, orgtehnıka men ústińgi (betki)qabattardy dezınfeksııalaý.

COVID-19-ǵa kúdiktengen jaǵdaıda dereý oqshaýlanyp, maska taǵyp, ony árbir úsh saǵat saıyn aýystyrý kerek. Jaǵdaıy nasharlap, dene qyzýy kóterilse emhanaǵa habarlasyp, óziniń jaǵdaıy men shaǵymdary týraly habarlap, dárigerlerdiń nusqaýlyǵyn qatań ustaný kerek. Sonymen birge adamdarmen baılanysty azaıtý kerek, ásirese juqtyrý belgileri bolsa, jótelip, túshkirgen kezde aýyzdy jabý úshin bir rettik salfetkalardy paıdalanǵan jón, bólmede ylǵaldy tazalyqty dezınfeksııalyq quraldardyń kómegimen júrgizip, jıi jeldetip otyrý kerek.

Suraqtar bolǵan jaǵdaıda Almaty turǵyndary 1406 nemese 1308 nomerleri boıynsha habarlasa alady (OpenAlmaty).