Tólebı APB-ne jergilikti turǵyn shaǵym túsiredi. Jábirlenýshi áıeldiń aıtýynsha ózine jaqsy tanys emes adam, úsh jyl merzimge bas bostandyǵynan aıyrylǵan qaınysyn túrmeden bosatyp beremin dep aldap, senimine kirgen. Sodan turǵyn alaıaqqa aldanyp, birneshe bólip aqsha bergenin, áni-mine shyǵarady degenine sengenin, osylaısha jylǵa jýyq ýaqyt ótip, endi polıseılerden basqa eshkim kúdiktini ustaı almaıtynyn aıtyp, kómek suraǵan.
Atalǵan jaıt QR QK-niń 190-baby “Alaıaqtyq” boıynsha tirkelgen. Jábirlenýshige keltirilgen shyǵyn kólemi 1,5 mıllıon teńgeni qurady. Tólebılik turǵyndy aldap túsirgen alaıaqty anyqtap, ustaý maqsatynda Tólebı aýdandyq polısııa bóliminiń qyraǵy polıseıleri qatarynan jedel-tergeý toby qurylǵan. Tártip saqshylary jábirlenýshiniń aıtýymen kúdiktini izdep, basqa aýdan, qalalarǵa baǵyttamalar bergen.
Nátıjesinde alaıaqtyń jeke-basy anyqtalyp, qashyp júrgen ol, úıine kelgen jerinen ustaldy. Kúdikti Shymkent qalasynyń turǵyny bolyp shyqty. Tergeý barysynda anyqtalǵandaı kúdikti jábirlenýshimen kezdeısoq kezdesip qalyp, áńgime arasynda sottalǵan qaınysyn shyǵara alatyn aıtyp, aldap, odan aqsha alǵanyn tolyq moıyndady. Kúdikti óz sózinde osy qylmysty aqsha qajet bolǵandyqtan, ońaı jolmen oljaly bolý maqsatynda jasaǵanyn jetkizdi. Kúdiktiniń bas sharasy qolhatpen bosatyldy. Qazirgi tańda sotqa deıingi tergeý amaldary “Alaıaqtyq” babymen júrgizilip, jınaqtalǵan materıaldar sotqa joldanǵan.
Túrkistan oblysynyń polıseıleri turǵyndarǵa ózińizge beıtanys adamdarǵa senbeýdi, olardyń zańsyz usynǵan usynystaryn qabyl almaýdy eskertedi. “Jumysqa turǵyzyp beremin, memlekettik járdemaqy, kómek alyp beremin, kezeksiz tirligińizdi bitirip beremin” – degen sarynda ýáde beretin alaıaqqa senim artpaýǵa shaqyrady.
