Qazaqstannyń "Jasyl ekonomıkaǵa" kóshýi jónindegi 2013-2020 jyldarǵa arnalǵan tujyrymdamanyń is-sharalar josparyn iske asyrý aıasynda turaqty jáne ónimdiligi joǵary aýyl sharýashylyǵyn damytý týraly QR ekologııa, geologııa jáne tabıǵı resýrstar mınıstri M. Myrzaǵalıev, aýyl sharýashylyǵy mınıstri S. Omarov, óńirlerde ekologııalyq jaǵdaıdy jaqsartý jáne "jasyl ekonomıkany" damytý jónindegi sharalar týraly Aqtóbe oblysynyń ákimi O. Orazalın, Mańǵystaý oblysynyń ákimi S. Trumov, Nur-Sultan q. ákimi A. Kólginov jáne Almaty q. ákiminiń birinshi orynbasary E. Qojaǵapanov baıandady. Sonymen qatar BUU Damý Baǵdarlamasynyń QR-daǵy turaqty ókili Iа. Berısh túsinikteme berip ótti.
"Jasyl ekonomıkaǵa" kóshý aıasynda zamanaýı sýarý júıelerin engizýdi yntalandyrý maqsatynda AО́K sýbektilerine ınfraqurylymdy jetkizý jáne sýarý júıelerin satyp alý shyǵyndarynyń 50%-yn óteý, nesıeler men lızıng boıynsha syıaqy mólsherlemesiniń 10%-yn sýbsıdııalaý boıynsha sharalar qabyldandy. 2022 jylǵa qaraı sýarmaly jerlerdiń kólemin 2 mln ga deıin jetkizý josparlanǵan. Buǵan qosa kúrish pen maqta sııaqty sýdy kóp talap etetin daqyldardyń alqaptaryn azaıtý jumysy jalǵasady.
Fermerlerdiń ozyq jylyjaı tehnologııalaryn engizýin yntalandyrý maqsatynda jabdyqtardyń tıisti júıelerin jáne keshendi sheshimderdi satyp alýdy kózdeıtin arnaıy ınvestısııalyq pasport ázirlendi. Jylyjaı keshenderin salý jáne olardy keńeıtý shyǵyndarynyń 30%-yn óteýmen ınvestısııalyq sýbsıdııalar engizildi. Jylyjaı óndirisi naryǵynyń kólemi 2,4 ese — 90 myń tonnadan 216,9 myń tonnaǵa deıin, al jylyjaı sharýashylyqtarynyń aýdany 2,1 ese — 575,9 ga-dan 1236,7 ga deıin ulǵaıdy.
Qazirgi tańda 180,1 mln ga jaıylym jerleriniń 106,2 mln ga (59%) jeri sýlandyryldy. Jaıylym jerlerin damytýdy yntalandyrý úshin sýlandyrý ınfraqurylymyn qurý shyǵyndarynyń 80%-na deıin ınvestısııalyq sýbsıdııalaý engizildi. 2014-2019 jyldar kezeńinde jaıylymdardy sýlandyrý úshin 5978 qudyq salyndy, al josparlanǵan kórsetkish — 3633.
"Ulttyq agrarlyq ǵylymı-bilim berý ortalyǵy" KEAQ bilim berý ortalyqtarynda jáne aldyńǵy qatarly aýyl sharýashylyǵy kásiporyndarynyń bazasynda AО́K damytýdyń barlyq baǵyttary, onyń ishinde "jasyl" aýyl sharýashylyǵy qaǵıdattaryn engizý boıynsha 25 myńnan astam tyńdaýshynyń qatysýymen 1400-ge jýyq semınar ótkizildi.
Otyrysqa qatysýshylar qaldyqtardy basqarý júıesin jaqsartý, jańartylatyn energııa kózderin damytý, eldi mekenderdi gazdandyrý jáne "taza" kólikti damytý arqyly aýanyń lastanýyn tómendetý máselelerin qarady.
Keńes Nur-Sultan jáne Almaty qalalarynyń ekologııalyq problemalaryn keshendi túrde sheshý jónindegi jol kartasynyń jobasyn bekitti. Qujat Almaty qalasynyń 2-JEO men 3-JEO jańǵyrtýdy, Nur-Sultan qalasynyń 1-JEO men 2-JEO-ǵa jetkizýshi gaz qubyrlaryn salýdy, sý jylytatyn jáne energetıkalyq qazandyqtardy gazǵa aýystyrýdy, aǵashtardy kesýge qatysty ruqsat berý rásimderin kúsheıtýdi, jasyl jelekter alańyn ulǵaıtýdy, qoǵamdyq kólikti, kommýnaldyq qyzmet kólikterin gazǵa jáne elektr energııasyna aýystyrýdy, sondaı-aq basqa da sharalardy qarastyrady.
