«Ulttyq komıssııa otbasy men balalardyń múddelerin qorǵaýǵa qatysty ózekti máselelerdi talqylaý boıynsha qoǵamdyq dıalogty damytýdy jalǵastyrýda. «Otbasylyq-turmystyq zorlyq-zombylyqqa qarsy is-qımyl týraly» zań jobasy ázirlendi. Búgingi tańda quqyq qorǵaýshy ÚEU-nyń belsendi qatysýymen 13 onlaın-talqylaý ótkizildi», dedi L.Ramazanova.
Otyrysta elimizdegi 2030 jylǵa deıingi otbasylyq jáne genderlik saıasat tujyrymdamasyn iske asyrý jónindegi is-sharalar josparynyń birinshi kezeńiniń oryndalý qorytyndysy baıandaldy.
Jıynda belgili bolǵandaı, otbasy ınstıtýtyn nyǵaıtýǵa, otbasylyq qundylyqtardy ilgeriletýge baǵyttalǵan birqatar áleýmettik-mańyzdy jobalar iske asyrylǵan. Joǵarǵy sottyń qoldaýymen «Baqytty otbasy» otbasylyq sottar janyndaǵy otbasyn resýrstyq qoldaýdyń 12 ortalyǵynyń qyzmeti qamtamasyz etilgen (Nur-Sultan, Almaty qalalarynda, Qaraǵandy, Aqmola, Atyraý, Jambyl, Qostanaı jáne Shyǵys Qazaqstan oblystarynda). Esepti kezeńde ortalyqtarǵa 2 750-den astam adam, onyń ishinde ajyrasý máseleleri boıynsha – 2030 adam ótinish jasaǵan. Tatýlasýǵa daıyn adamdar sany 38,1%-dy (774 adam) quraǵan.
«ÓNEGE» jobasy sheńberinde 9 óńirde áleýmettik qyzmetter 1125 konsýltasııalyq qyzmet kórsetti jáne otbasylardaǵy ómirlik qıyn jaǵdaıdyń 225 oqıǵasy boıynsha kómek bergen. 19 myń adam tegin keńes alǵan. Olardyń 350-i qıyn ómirlik jaǵdaıǵa tap bolǵan.
«Rýhanı jańǵyrý» qazaqstandyq qoǵamdyq damý ınstıtýtynyń qurylymynda otbasy ınstıtýtyn zertteý ortalyǵy ashylǵan. Bıyl ortalyq tarapynan otbasynyń ózekti máseleleri boıynsha birqatar zertteýler júrgizilmek.
2019 jyly Nur-Sultan qalasynda «Januıa» ortalyǵy ashyldy, ol «bir tereze» qaǵıdaty boıynsha qala turǵyndaryna kórsetiletin memlekettik qyzmetterdi biriktiredi jáne otbasylarmen jeke jumys júrgizedi. Búgingi kúni ortalyqqa 14,8 myń suraqpen 7 myńǵa jýyq adam júgingen. 11,5 myńnan astam keńes berilip, onyń barysynda 3,5 myńnan astam másele sheshildi.
Talqylaý barysynda Qazaqstandaǵy otbasylyq jáne genderlik saıasat salasyndaǵy nysanaly ındıkatorlarǵa qol jetkizýge baılanysty birqatar máseleler atap ótildi. Otyrysqa qatysýshylarǵa IýNFPA-nyń Qazaqstandaǵy ókildigi ótkizgen «urpaq jáne gender» zertteý qorytyndylary usynyldy. Demografııalyq damýdy anyqtaıtyn halyqtyń qonystanýy salasyndaǵy faktorlardyń biri adamnyń reprodýktıvti densaýlyǵyn qorǵaý bolyp tabylatyny, al onyń basty maqsaty – deni saý balalardyń dúnıege kelýi atap ótildi.
Sońynda Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń 20 jyldyǵyna arnalǵan kitap tanystyryldy. Otyrys qorytyndysy boıynsha tıisti mınıstrlikter men jergilikti atqarýshy organdarǵa naqty tapsyrmalar berildi.
