«Til máselesine beıjaı qarap, nemquraıdylyq tanytatyn bolsaq, memlekettigimiz ben ulttyq qaýipsizdigimizge qater tóndirip alýymyz múmkin» deı kelip Memleket basshysy memlekettik tildiń aıasyn keńeıtýge baılanysty óreli tujyrymdaryn ortaǵa salady. «Qazaq tilinde sóıleý maqtanysh bolýy úshin qoǵamda oǵan degen qajettilikti arttyrǵan jón. Memlekettik qyzmetke, onyń ishinde, halyqpen tyǵyz jumys isteıtin laýazymǵa taǵaıyndaý kezinde kásibı biliktiligine qosa, qazaq tilin jaqsy biletin azamattarǵa basymdyq berý kerek». Memlekettik qyzmetshiler memlekettik tildi bilýi tıis dep jıi aıtylatyn áńgimeniń basty tetigi osy. Prezıdent qazaq tiline qajettilikti arttyrý qajet ekenin, halyqpen etene jumys isteıtin laýazymǵa kásibı biliktiligine qosa, qazaq tilin jaqsy biletin azamattarǵa basymdyq berý kerek ekendigin taıǵa tańba basqandaı aıtyp otyr emes pe. Aldaǵy kúnderi Prezıdenttiń osy oı oramdary bılik tarapynan júzege asyrylatyn bolsa, memlekettik tilge qatysty qordalanǵan máseleniń túıini tarqatyla túsetini anyq.
Taǵy bir tilge tıek eter jaıt, Memleket basshysy ana tilinen beıhabar azamattarǵa baılanysty qatqyldaý synı pikirin bildirdi. Iаǵnı «Parlamentte nemese baspasóz máslıhattarynda memlekettik tilde sóılep, pikir almasa almaıtyn memlekettik qyzmetker uǵymy, eń aldymen, qazaq azamattarynyń arasynda – anahronızmge aınalýǵa tıis». Bıliktegi qazaqtar ana tilin bilýi tıis dep uqtyq biz muny.
Qasym-Jomart Toqaevtyń suhbatynda eldik máselesi de, eldikti kórkeıtetin eńbek máselesi de qozǵalǵan. Eldik demekshi, Prezıdent elimizdi órkendetý óz qolymyzda ekenine de aıryqsha toqtalǵan. «Bizdiń osyndaı syndarly sátte qatelesýge esh qaqymyz da, quqymyz da joq. Jáne memleket qurýshy ult retinde bul máseleni birinshi kezekte ózimiz tereń sezinýimiz qajet. О́ıtkeni qazaq halqynyń taǵdyry tarıh tarazysynda tur…» dep túıindedi memlekettilikke qatysty tujyrymyn Memleket basshysy.
Al eńbekke qatysty oıy áli kúnge beıqam qazaqqa, jahandaný zamanynda, básekelestik kezeń beleń alǵan tusta toıshyl daǵdysynan arylmaǵan aǵaıynǵa qarata aıtylǵan arnaý sóz dep qabyldadyq.
«Qazir «Toıyń toıǵa ulassyn» dep ándetip, toı toılap júretin ýaqyt emes. Búgingideı tehnologııanyń zamanynda toı-tomalaqtyń áńgimesin aıtyp, bir-birin asyra maqtap, as iship, aıaq bosatqanǵa rıza keıipte júrý ádetinen arylý kerek». Prezıdent Q.Toqaevtyń eldik kredosy bul. «Halyqtyń qazynasy toı emes», tynymsyz tirlik, úzdiksiz eńbek, sol arqyly eldiń órkendeýi, halyqtyń kórkeıýi ekendigin ańǵartady.
«Memlekettiń ózi ólermendikpen ómir súretin kezge keldik. Sondyqtan eńbek etý – ómir súrý saltyna aınalyp, basty mindet sanalýǵa tıis. Toı qýalaıtyn emes, oı qýalaıtyn kezeńmen betpe-bet keldik. Bul dáýir – aqyl-oıdyń, ǵylym men bilimniń, eńbektiń dáýiri!» Parasatty Prezıdenttiń paıymy bul. Oı qýalaǵan qazaqtyń órisi de keńeıip, órkenıettegi de orny bólek bolýǵa tıis. Endeshe, sol kúnderge tezirek jetý úshin etken eńbegimizdiń esesin bersin.
