Qoǵam • 30 Maýsym, 2020

О́kpe aýrýy órship tur

Aty jaman indettiń ózgergen túri ispetti jazǵy tumaý túrkistandyqtardy da ábigerge salýda. Sońǵy kelip jetken aqparattarǵa súıensek, oblys kóleminde osy túrdegi juqpaly tumaýmen aýyrǵandardyń qatary 1 myńnan asqan. Qazir oblys turǵyndary tumaýdyń belgilerimen dárigerlik kómekke jıi júginýde. Medısınalyq tekserý nátıjesinde naýqastardan pnevmonııa, ıaǵnı ókpeniń qabynýy anyqtalǵan.

Ǵalymjan ELShIBAI

Statıstıka boıynsha qazirgi tańda Túrkistan oblysyndaǵy provızorlyq aýrýhanalarda 958 naýqas pnevmonııadan em qabyldap jatyr. Onyń ishinde, Túrkistan qalalyq aýrýhanasynda 50, Kentaýda 180 adamǵa em júrgizilýde. Pnevmonııadan 198 naýqas jazylyp shyqsa, 1 maýsymnan beri oblys kóleminde 23 adam atalǵan dertten kóz jumdy. Aıta ketetini, kórsetkish halyqtyń beıqamdyǵynan kóterilip otyr.

Bul týraly oblystyq qoǵamdyq densaýlyq basqarmasynyń basshysy Marat Pashımov málimdedi. Bas dárigerdiń aıtýynsha, áleýmettik jelilerdegi aýrýhanalarda oryn jetispeýshiligi týraly aqparat shyndyqqa janaspaıdy. Naýqastarǵa tósek-oryn jetkilikti.

«Qazir oblys kóleminde dári-dármek qory men ottegi oryndary jetkilikti. Indetke qajetti antıbıotıktardy aldyrýdamyz. Sondaı-aq aýrýhanalarda tósek-oryndar boıynsha tapshylyq joq. Qosymsha oryndar ázirlengen. Máselen, Kentaý qalalyq ortalyq aýrýhanasynda 50 oryndyq somatıkalyq bólimshe qaıta beıimdelip, qosymsha 200 oryndyq tósek-oryn, 16 ottegi oryny daıyndaldy. Al Túrkistan qalalyq ortalyq aýrýhanasynda qosymsha 270 tósek-oryn ázirlengen. Oryn alǵan jaǵdaıǵa baılanysty Túrkistan jáne Kentaý qalalarynda naýqastardy josparly jatqyzý toqtatylǵan. HQTÝ, «Akmaral», «Klınıka Talǵat» syndy jeke klınıkalar da ózderine bekitilgen turǵyndarǵa tıisti medısınalyq qyzmet kórsetýde», dedi Marat Orynbasaruly.

Sonymen qatar Túrkistan qalalyq ortalyq aýrýhanasynyń bas dárigeri Janbolat Dildábekov oblys ortalyǵynda ekpe bólmeleriniń tapshylyǵyna baılanysty qosymsha oryndar daıarlanǵanyn, qalalyq aýrýhanada tósek-oryn sany artyp, naýqastarǵa qajetti dári-dármekter qosymsha alynyp jatqanyn jetkizdi.

Qazir Túrkistan oblysynda COVID-19 indetine shaldyqqandardy oqshaýlaýǵa arnalǵan 270 oryn bolsa, búginde 164-inde naýqastar em qabyldaýda. Bulardyń deni koronavırýs indetin juqtyryp nemese juqtyrǵandarmen tyǵyz qarym-qatynasta bolyp, em qabyldap jatqandar. Bul týraly oblystyq qoǵamdyq densaýlyq saqtaý basqarmasy basshysynyń orynbasary Nurhan Narymbetova málim etti.

Basqarma basshysy orynbasarynyń aıtýynsha, budan bólek, koronavırýs indetine uqsas belgileri bar aýrýǵa shaldyqqandardy qabyldaıtyn qosymsha 885 adamǵa arnalǵan orynda búginde 962 adam em-dom qabyldaýda. Bir qýanarlyǵy, olardyń basym kópshiliginde koronavırýs derti anyqtalmaǵan. Iаǵnı pnevmonııa, JRVI sekildi syrqatqa shaldyqqandar. Sondaı-aq oblysta 124 jedel járdem brıgadasy kúndiz-túni toqtaýsyz jumys isteýde.

Aıta keterligi, ótken jyldyń bes aıynda óńirde ókpe qabyný dertimen 9735 adam naýqastanyp, jazylyp shyqqan. Al 2020 jyldyń 5 aıynda 7749 naýqas ókpe qabynýy dıagnozymen aýrýhanaǵa jatqyzylyp, olardyń bári aýrýynan tolyq aıyǵyp shyqqan. Osy jyldyń 22 maýsymyna deıingi derek boıynsha 461 naýqas osy dertpen em qabyldap jatsa, sonyń 423-i aıyǵyp shyqty.