Jyl basynan beri oblys polıseıleri esirtki ekkenderge qarsy is-qımyl sharalaryn kúsheıtip, oblysqa qarasty barlyq qala, aýdandarda reıd júrgizip, esirtkimen aınalysqan, ony satqan jáne tasymaldaǵan quqyq buzýshylarǵa qatysty jedel-aldyn alý sharalaryn iske asyryp jatyr. Máselen, Qazyǵurt aýdandyq polısııa bóliminiń qyzmetkerleri turǵyn úıiniń aýlasynda esirtki tektes sora ósimdigin ósirgen er adamdy ustady.
Atalǵan jaıt sotqa deıingi tergep-tekserýdiń biryńǵaı tizilimine engizilip, QR QK-niń 300-baby boıynsha "Quramynda esirtki zattar bar, ósirýge tyıym salynǵan ósimdikterdi zańsyz egip-ósirý" qylmystyq is qozǵaldy. Jedel qurylǵan polıseıler toby kúdiktiniń aýlasyndaǵy baý-baqshasynyń 15 túp sora ósimdigin taýyp, aıǵaqty zat retinde tárkilep aldy. Saraptama taǵaıyndaldy.
Qorytyndyǵa sáıkes alynǵan túpter 30 kelige jýyq "sora" esirtkisi bolyp shyqty. Kúdiktiniń bas sharasy mindettememen bosatyldy. Qazirgi tańda osy is boıynsha tergep-tekserý amaldary júrgizilip jatyr. Tergeýshiler er adam sora esirtkisin óziniń aýlasynda ne sebepti ósirgenin anyqtaıdy.
Túrkistan oblysynyń tártip saqshylary tyıym salynǵan ósimdikterdi ósirý, zańsyz esirtki saýdasymen aınalysý, jalpy esirtkige qatysy bar jaıttar zań aldynda qatań jazaǵa tartylatynyn eskertedi. Keı sátteri qylmys jasap, zań buzǵan adamnyń jazalanatynyn bile tura zańsyzdyqqa jol berilip jatady.
Esirtkiniń qoǵam derti ekendigin esten shyǵarmaı, ony ósirip, qoldanyp, tasymaldaǵandarmen kúresýdi kúsheıtýimiz qajet. Sondyqtan siz, esirtki boıynsha qandaı da bir aqparattardy bilseńiz birden polısııanyń "102" nómirine habarlasyńyz. Bul óz kezeginde esirtkige baılanysty qylmystardyń azaıýymen jolyn kesýge septigin tıgizedi.
