S.Omarov: "Eksporttyq gıdterdiń" úlgilik júıesin engizý josparlanýda

Áleýmettik mańyzy bar azyq-túlik taýarlaryna baǵanyń ósýin boldyrmaý maqsatynda Aýyl sharýashylyǵy mınıstrligi ishki naryqty molyqtyrý boıynsha josparly jumys júrgizýde. Import almastyrýdy eskere otyryp, ınvestısııalyq jobalardy iske asyrý jóninde jospar ázirlendi.

Saqtaý ınfraqurylymy boıynsha qazir respýblıkada 27 mln tonna saqtaý syıymdylyǵy, onyń ishinde 189 lısenzııalanǵan astyq qabyldaý kásiporny bar.

Alaıda, mınıstrdiń aıtýynsha, shaǵyn jáne orta fermerlerge arnalǵan 10 myń tonnaǵa deıingi kishigirim astyq qoımalarynyń máselesin sheshý kerek. Mundaı tájirıbe AQSh pen Kanadada bar, Qazaqstan da bul baǵytta memlekettik qoldaý sharalaryn engizýdi josparlap otyr.

Sonymen qatar maýsymaralyq kezeńde qazirgi zamanǵy kókónis saqtaý oryndary men jemis saqtaý oryndary jetispeıdi. Bul úshin zamanaýı saqtaý oryndaryn salýǵa jeńildetilgen nesıe berý jáne ınvestısııalyq sýbsıdııalaý júzege asyrylýda.

"Agroónerkásiptik keshenniń eksporttyq áleýetin iske asyrýǵa qatysty syrtqy naryqtardyń konıýnktýrasy zertteledi. Kólik shyǵyndaryn sýbsıdııalaýmen qatar, eksporttyq ónimdi sertıfıkattaýǵa jumsalǵan shyǵynǵa ótemaqy engizý,  sondaı-aq otandyq aýyl sharýashylyǵy ónimin ilgeriletýdiń jańa tıimdi marketıngtik quraldaryn engizý pysyqtalady. Importtaýshy elderdiń naryqtaryna egjeı-tegjeıli sholý jasaı otyryp, "eksporttyq gıdterdiń" úlgilik júıesin engizý josparlanyp otyr", dedi S.Omarov.

Aýyl sharýashylyǵy ónimin óńdeýde biryńǵaı saıasatty qalyptastyrý úshin tıisti fýnksııalar men qajetti shtat sanyn eskere otyryp, Aýyl sharýashylyǵy mınıstrliginiń quramynda Tamaq jáne óńdeý ónerkásibi komıtetin qurýdy usynylady.

Sondaı-aq Agroónerkásiptik keshendi damytýdyń kelesi kezeńge arnalǵan jańa memlekettik baǵdarlamasynyń tujyrymdamasynda Shıkizat jáne óńdeý salalaryn damytý jóninde biryńǵaı tásildeme qarastyrylady.

Jer máselelerine qatysty Aýyl sharýashylyǵy mınıstrligi Prezıdent Ákimshiligi Qaýipsizdik Keńesiniń taldamalyq tobymen birlese otyryp, aýyl sharýashylyǵy maqsatyndaǵy jerlerdi paıdalanýdyń álemdik tájirıbesine taldaý jasady. Keńinen talqylaýǵa shyǵarylatyn birqatar usynys ázirlendi.

"4 óńirde ǵaryshtyq monıtorıng boıynsha pılottyq joba iske asyrylýda. Pılottyq jobanyń jaıylymdyq alqaptar boıynsha birinshi kezeńi aıaqtaldy, jyrtylǵan jerler boıynsha ekinshi kezeń bastaldy, ol jyl sońyna deıin aıaqtalady", dep málimdedi mınıstr.

Jer qatynastary salasyn sıfrlandyrý jónindegi zań jobasynyń tujyrymdamasy ázirlendi, ol jer ýchaskelerin elektrondyq formatta tikeleı usynýdy kózdeıdi. Talqylaý aıaqtalǵannan keıin Zań jobasy bıylǵy 15 qyrkúıekke deıin Parlament Májilisine engiziledi.

Mınıstrdiń málimetinshe, jekelegen shekteýlerdi saqtaý múmkindigi jaǵdaıynda egin jınaýdy qamtamasyz etý maqsatynda bıyl kóktemde synaqtan ótken Jumys algorıtmi iske qosylady. Bul Algorıtmge fermerlerdiń bógetsiz júrip-turýy, janar-jaǵar maı men qosalqy bólshekterdi jetkizýi, sondaı-aq elektrondyq túrdegi jáne qaǵaz formattaǵy arnaıy ruqsattary kiredi.

"Egin jınaý naýqanyna qajetti tehnıkany daıyndaý jumysy bastaldy, jappaı jumystardy bastaýǵa daıyndyq 100%-dy quraıdy. Elevatorlar men astyq qoımalarynyń materıaldyq-tehnıkalyq bazasyn daıyndaý jumystary júrgizilýde", dep túıindedi S.Omarov.