Bul másele aımaq basshysynyń bastamasymen qolǵa alynǵanyn aıta ketken abzal. Arhımed Muhambetov áleýmettik jelidegi jeke paraqshasyna «Sverdlov jáne Chelıabi oblystarynyń gýbernatorlarymen kelisim boıynsha bizdiń oblystyń dárigerlerine vırýstyq ınfeksııamen aýyratyn naýqastardy emdeý boıynsha tájirıbelik kómek kórsetile bastady.
Bizdiń kórshilerimizdiń jetekshi dárigerleri aýyr pasıentterdi emdeý ádisi boıynsha turaqty keńes berip otyratyn bolady. Sondaı-aq, koronavırýstyq ınfeksııany emdeýdiń ózekti máseleleri boıynsha teledárister arqyly oblys dárigerleriniń biliktiligin arttyrady. Alǵashqy telekópir 15 shilde kúni saǵat 10.00-de bastaldy» - dep jazdy.
Qazir reseılik mamandar oblys dárigerleri úshin onlaın rejimde dáris oqyp jatyr. Biliktilik arttyrý maqsatyndaǵy beınekonferensııalar eki aptaǵa sozylmaq.
- Pandemııaǵa qarsy kúreste paıdasy zor tájirıbe almasý dáristerine aımaqtyń myńnan astam dárigeri ózderi qyzmet etip jatqan qalalar men aýdandarda otyryp-aq beınekonferensııa rejiminde qatysatyn bolady. Kelisim boıynsha osy aptanyń aıaǵyna deıin Chelıabi oblysynyń dárigerleri dáris oqıdy. Kelesi aptada Sverdlov oblysynyń mamandary semınar ótkizedi. Onlaın konferensııalarǵa oblys dárigerleri óz jumys oryndarynda otyryp-aq birden 75 baılanys núktesi arqyly qosylady, - dedi densaýlyq saqtaý basqarmasynyń basshysy Vıacheslav Dýdnık.
Osy apta ishinde Chelıabi qalasynyń 6 professory semınar ótkizedi. Bir semınardyń ózi,kem degende, 1 jarym saǵatqa deıin sozylady. Keshe medısına ǵylymynyń doktory, ınfeksııalyq aýrýlar kafedrasynyń professory Lıýdmıla Ratnıkova reseılik dárigerlerdiń indettiń aldyn alý, em júrgizý jáne asa kúrdeli jaǵdaıdaǵy naýqastarǵa kómek kórsetý ádisterimen bólisti. Mamannyń pikirinshe, pandemııa kezeńinde telemedısınanyń mańyzy zor. Sondyqtan, reseılik professorlar aýyr naýqastardy emdeý kezinde aımaqtyń jetekshi dárigerlerine onlaın baılanys arqyly kómek kórsetýge yntaly ekendikterin bildirip otyr.
