13-17 shilde aralyǵynda jedel baqylaý jáne qordalanǵan máselelerdi sheshý úshin aýdan ákimi Berik Jákenov jáne onyń komandasy keńsesin Úrker turǵyn alabyna kóshirdi. Aýdan ákimdigi jaýapty memlekettik organdar men qala ákimdiginiń qurylymdyq bólimsheleriniń arasynan Úrkerdiń máselelerin sheshý úshin jumys tobyn qurdy. Bir apta boıy ashyq keńistikte Esil aýdanynyń ákimi Úrker turǵyndaryn qabyldaıdy.
"Osy ýaqyt ishinde biz 50-den astam adamdy qabyldadyq. Jaryqtandyrý, jol men ınjenerlik jeliler máseleleri ózektiligin joǵaltpaıdy – biz sol jerde túsindirmeler beremiz. Soǵan qaramastan, árbir ótinim tirkelip, pysyqtalatyn bolady", dedi Esil aýdany ákimi Berik Jákenov.
Bıyl Úrkerde 2700 aǵash pen kóshet otyrǵyzylady, onyń 1080-i otyrǵyzyldy. Sonymen qatar "Jumyspen qamtýdyń jol kartasy-2020" baǵdarlamasy aıasynda eki qoǵamdyq keńistik abattandyrylýda. Aýdan ákimdiginiń merdigerleri qamys pen aramshópter jınaýdy jalǵastyrýda. Qazirdiń ózinde bes kóshede 17 myń sharshy metr shóp shabyldy.
Sonymen birge Ekologııa polısııasynyń qyzmetkerleri qala syrty men aımaqtaryna qoqys pen qurylys qaldyqtaryn tógýge jol bermeý maqsatynda túsindirý jumystaryn, reıdter júrgizýde. Eki kún ishinde 15-ke jýyq buıryq shyǵarylyp, Ákimshilik kodekstiń 505-baby boıynsha 10 hattama jasaldy. О́z kezeginde qalalyq sáýlet basqarmasy jer ýchaskelerin(ıgerilmegen) túgendeý, jataqhana men kópqabatty ǵımarattar salý josparlaryn naqtylaý jumystaryn bastady.
Sondaı-aq jeke turǵyn úı salýǵa, ShOB, zańsyz jataqhanalarǵa arnalǵan ruqsattar berýmen aınalysýda. Búgingi tańda nysanaly emes maqsattaǵy 80-nen astam ýchaske anyqtalyp, materıaldar tıisti sharalar qabyldaý úshin jer ınspeksııasy organdaryna tapsyryldy.
Budan bólek, "Astana sý arnasymen" birge ashyq uńǵymalardyń tizbeleri, káriz qubyrlaryndaǵy aqaýlar tekserilip, sý tartý jáne sýdyń qysymyn retteý máselesi pysyqtalyp jatyr. Turǵyn alabynyń aýmaǵynda qońyraýlarǵa jedel jaýap berý úshin mobıldi baza salynýda. Al "Astana qalalyq jaryq" kóshe jaryqtandyrý qurylǵylaryna túgendeý júrgizýde. Bıyl Úrkerde 250-den astam jańa jaryqtandyrý shamdary ornatylady.
Jol, káriz jáne ınjenerlik jeliler qurylysy boıynsha jumystardyń ákimshisi – otyn-energetıkalyq kesheni jáne kommýnaldyq sharýashylyq basqarmasy. Merdigerler №593 kóshesine asfalt tóseýde. Qazir 1,5 km asfalt tóselip úlgerdi, bıyl barlyǵy 6 km joldy asfalttaý josparlanǵan. Á.Qashaýbaev kóshesinde (Qozykósh buryshy) ınjenerlik jeliler, Sattarhanov kóshesinde jer asty sýlary deńgeıin tómendetý jumystary júrgizilýde. Sondaı-aq Beket ata kóshesiniń boıynda káriz jelileri tartylýda. Eske salsaq, Nur-Sultannyń barlyq tórt aýdanynda aýqymdy abattandyrý jumystary júrgizilip, joldar jóndelýde. Qoǵamdyq oryndar (alleıalar, skverler, saıabaqtar), aýlalar men sport alańdary salynyp, aǵashtar otyrǵyzylýda.
