– Halyq ártisi Ánýar Boranbaev atyndaǵy orta mektep janyndaǵy ınternatqa «Alıýmınstroı» JShS qurylys kompanııasy qaıta kúrdeli jóndeý júrgizip jatyr. Merdiger jumysyn tapsyrǵan soń shalǵaıdaǵy shaǵyn aýyldardan keletin 70 shákirt osynda jatyp bilim alady. Atalǵan jobaǵa oblys bıýdjetinen 133 mln teńge qarajat bólinip otyr. Internattyń shatyrynan sý aǵyp, ishki qabyrǵalarynyń sylaǵy túsip, tozyp ketip edi. Qurylysshylar ǵımarattyń tóbesin tolyq ashyp, eski jabynyn alyp tastap, ornyna tózimdi ári zamanaýı metall shatyr japty. Burynǵy eski aǵash terezelerdiń ornyna sapaly plastık terezeler qoıyldy. Sonymen qatar jatyn bólmeler ońtaılandyrylyp, ara qabyrǵalar qoıylýda. Buǵan deıin 3-4 bala birge jatyp kelse, endi bir bólmede eki bala ǵana jatatyn bolady, – dedi mektep ınternattyń meńgerýshisi Aıgúl Dıhambaeva.
Aýdan ákiminiń orynbasary Súndet Joldybekulynyń aıtýynsha, osydan eki jyl buryn Á.Boranbaev atyndaǵy orta mektep oblys bıýdjetinen bólingen 180 mln teńge qarajatqa kúrdeli jóndeýden ótken. Bilim oshaǵy sol jyly 24 mln teńgege materıaldyq-tehnıkalyq bazasyn da jańartyp alypty.
– Bilim mekemesine qajetti barlyq qural-jabdyqtar alyndy. Mekteptiń jylý qazandyǵy úshin jeke ǵımarat salyndy. Al mektep janyndaǵy ınternat kóp jyldardan beri jóndeý kórmeı, qıyndyq týdyryp kelgen-di. Bıyl «Aýyl – el besigi» baǵdarlamasynyń arqasynda kúrdeli jóndeýden ótip jatyr, – dedi aýdan ákiminiń orynbasary.
Aımaqta jarııalanǵan shekteý sharalaryna baılanysty keı kúnderi munda da jumys tejelip qalyp jatyr. Biraq soǵan qaramastan, qurylysshylar mejelengen jumystyń basym bóligin eńserip tastapty. Eki qabatty ǵımarattyń syrtqy qabyrǵasy men shatyry tolyq bútindelip, búginde ishki jumystar júrip jatyr. Internat ýaǵdaly merzim ishinde tolyq jańartylyp, aldaǵy oqý jylynyń basynda balalardyń ıgiligine aınalmaq. Buǵan merdiger de nyq senimdi.
Qostanaı oblysy,
Amangeldi aýdany,
Amangeldi aýyly
