Onyń aıtýynsha, jalpy negizgi qaǵıdat boıynsha bul tólem jumys istep júrgen jáne karantınniń kúsheıtilgen sharalaryna qatysty tabysynan aırylǵan azamattarǵa tólenedi. Aldymen, bul járdemaqy aqysyz demalysqa jiberilgen jaldamaly jumyskerlerge beriledi. Munda ótinimdi tek jumys berýshi jiberedi. Qoıylatyn bir ǵana shart – jumysshylardyń jumysy karantınde toqtap qalsa ǵana beriledi. Ony jergilikti aýdan, qala boıynsha shtattar, «Atameken» UKP óńirlik ókilderi tekseredi. Sebebi qazirgi shekteý sharalary jeńildeý bolǵanymen, ár óńirde bas sanıtarlyq dárigerler óz shekteýlerin qoıyp jatyr.
Ekinshiden, karantınde jumysy turalaǵan jeke kásipkerlerge jáne jeke praktıkamen aınalysatyn azamattarǵa 42 500 teńge tólenedi. Olar ótinimdi ózderi beredi. Bul joly olarǵa zeınetaqy jarnalarynyń, áleýmettik jarnalardyń tólenýi nemese tólenbeýi týraly talap qoıylmaıdy.
Úshinshiden, azamattyq-quqyqtyq sıpattaǵy kelisimder boıynsha jumys istep júrgen frılanserler de járdemaqy ala alady. Ol úshin ótinimdi tikeleı ózderi beredi. Munda osy jyldyń 6 aıynyń ishinde bir ret bolsa da zeınetaqylyq jarnalaryn aýdarý týraly ǵana talap qoıylady.
Sondaı-aq óz betinshe jumys istep júrgen azamattar jumysy toqtap kalsa, tólem ala alady. Olarǵa aldyńǵydaı biryńǵaı jıyntyq tólem (BJT) tóleýdiń qajeti joq.
Al memlekettik bıýdjet esebinen zeınetaqy, memlekettik járdemaqylar, ataýly áleýmettik kómek nemese saqtandyrý qorynan tıisti kólemde kómek alyp júrgen azamattar karantın kezinde beriletin birjolǵy tólemdi ala almaıdy.
Buǵan qosa mınıstr jaqyn arada jumystan shyǵyp ketkender Jumyspen qamtý ortalyǵyna habarlasý kerek ekenin aıtty. Bul ortalyq turǵyndarǵa bos vakansııalardy nemese basqa da jumyspen qamtý sharalaryn usynady. Eger de esh jumys laıyq kelmese, úsh kúnde jumyssyz retinde tirkeledi jáne avtomatty túrde Memlekettik saqtandyrý qorynan jumyssyzdyqqa qatysty basqa tólem 6 aı boıy tólenedi.
«Stýdentter men dekrettegi áıelderge taǵy da túsindirip ketsem. Bul birjolǵy tólemde «stýdent», «dekrettegi áıel» degen sanattar joq. Iаǵnı stýdentke stýdent bolǵany úshin járdemaqy tólenbeıdi. О́tkende de solaı bolǵan. Biraq stýdent jaldanyp jumys istese, karantın kesirinen aqysyz demalysqa jiberilse, ol úshin jumys berýshisi ótinish bere alady. Al eger stýdent jeke kásipker bolyp, aı saıyn BJT tólep júrgen kásipker bolsa, ol jaǵdaıda da 42 500 teńge alady. Al endi osy kúnge deıin beıresmı jumys istedim dep bir ret BJT tólegen stýdentter 42 500 teńge ala almaıdy. Dekrettegi áıelderge qatysty ereje ózgerissiz qalatyn boldy. Ol degenimiz – bala 1 jasqa tolmaıynsha memleketten járdemaqy nemese saqtandyrý qorynan járdemaqy alyp júredi. Sondyqtan 1 jasqa tolǵansha tólemge úmittene almaıdy. Al 1 jastan assa, eger jumysqa shyǵyp, TJ boıynsha aqysyz demalysqa shyqsa, árıne ala alady. Jeke kásibi bolyp nemese BJT tólep júrip, jumysy toqtasa, ala alady», dedi B.Nurymbetov.
Sonymen qatar mınıstr 42 500 teńgelik kómekke ótinimdi qandaı portal arqyly usyný kerek ekenin atap ótti.
Jalaqysy saqtalmaıtyn demalysta júrgen jáne tólemge quqyǵy bar qyzmetkerlerdiń tizimin jumys berýshiler
egov.kz jáne 42500.enbek.kz portaldary arqyly usynady. Olardyń qyzmetiniń shektelý faktisin quramyna UKP men kásipodaqtardyń ókilderi kiretin aýdandyq jáne qalalyq shtabtar rastaıdy. Basqa sanattar tólemderdi taǵaıyndaý úshin óz betinshe ótinish beredi. Ol úshin biz birneshe joldy qarastyrdyq. Jaldamaly qyzmetker bolyp sanalmaıtyn, tólem taǵaıyndaýǵa jatatyn azamattar: egov.kz – «elektrondy úkimettiń» veb-portaly; 42 500.enbek.kz portaly; «Elektrondy úkimet» telegram-bot-y; Aitu messendjerinde
42 500.enbek.kz qosymshasy; ekinshi deńgeıdegi bankterdiń mobıldi qosymshalary men ınternet-resýrstary arqyly ótinim bere alady.
Sondaı-aq tólemderdi proaktıvti formatta taǵaıyndaý qarastyrylady. Qyzmeti shektelgen, sońǵy ret tólem alǵan azamattardan SMS arqyly tabysy toqtaǵanyn rastaý suralady. Oń jaýap pen proaktıvti túrde taǵaıyndaýǵa kelisim bolǵan jaǵdaıda, tólemder ótinimsiz taǵaıyndalady.
